Búgin «Astana Digital Forum»-nyń ashylý saltanatynda QR Aqparat jáne kommýnikatsiialar ministri Dáýren Abaev tsifrlandyrýdyń keibir artyqshylyqtary jaiynda aityp berdi, dep xabarlaidy QazAqparat tilshisi.
«El ekonomikasyn tsifrlandyrýdyń aýqymy keń. Myna bir nárseni elestetip kórińizshi, qazirgi aiyppuldardy eki saǵatta emes, tórt-aq klik basý arqyly rásimdeitin bolady. Búginde ondai joba bar. Adam óziniń jeke sáikestendirý nómirin kórsetedi de, aiyppuldyń elektrondy xattamasy biryńǵai bazaǵa jiberiledi. Sosyn bala týǵanda onyń qai balabaqshaǵa, qai mektepke baratyny birden anyqtalatyn bolady. Memlekettiń járdemaqy, balabaqsha kezegi - bári-bári áp-sátte jasalady. Tipti, perzentxanadan shyqpai-aq, balanyń atyn SMS-pen jiberip, jeke qujattardy da rásimdeýge bolady. Aldaǵy ýaqytta osyndai qyzmet te engiziledi», - deidi Abaev.
Ministrdiń aitýynsha, bolashaqta sapaly ǵalamtordy paidalaný jaǵynan qala men aýyldyń deńgeii teń bolýy qajet. Onsyz barlyǵy birdei elektrondyq qyzmetterdi qoldana almaidy. Osyǵan bailanysty «Tsifrlyq Qazaqstan» memlekettik baǵdarlamasy aiasynda 2021 jylǵa deiin taǵy 2 mln adamdy keń jolaqty internetpen qamtý josparlanǵan.
Aita keteiik, keshe elordadaǵy «Qazmedia» ortalyǵynda «Astana Media Week» aptalyǵy bastaldy. Búgingi «Astana Digital Forum» da atalǵan sharanyń aiasynda ótip otyr. Forýmda tsifrlyq marketing, kommýnikatsiialar salasyndaǵy tyń jobalar, messendjerler men chat-bottar, Telegram arqyly tabys tabý kózderi, Qazaqstandaǵy kriptovaliýtalar naryǵynyń damýy, elektrondy BAQ, áleýmettik jeliler men blogerler, internette biznes ashý joldary jáne taǵy basqa ózekti máseleler talqyǵa salynady.
