Dáýren Abaev Almatydaǵy birqatar sport nysandarynyń jumysymen tanysty, dep habarlaidy QazAqparat QR Mádeniet jáne sport ministrliginiń resmi saityna silteme jasap.
Ministr «Sportshylardyń dopingke qarsy zerthanasy» RMQK, «K.Ahmetov atyndaǵy olimpiada rezerviniń respýblikalyq mamandandyrylǵan mektep-internat-kolledji» RMM jáne «Sporttyq meditsina jáne ońaltý ortalyǵy» RMQK jáne «Respýblikalyq sport kolledji» respýblikalyq memlekettik qazynalyq kásipornyna bardy.
Mekemelerdiń ujymymen kezdesý barysynda ministr Qazaqstan Respýblikasynyń Prezidenti Qasym-Jomart Toqaevtyń sportty damytý jáne nasihattaý, halyq arasynda sporttyq infraqurylymnyń qoljetimdiligin arttyrý baǵytynda aýqymdy mindet qoiǵanyn atap ótti.
«Biylǵy jyl buqaralyq sportty damytý turǵysynan qaraǵanda jaǵymdy jańalyqtardan bastalmaǵanyn moiyndaýymyz kerek. Bul jerde sport sektsiialaryn jan basyna qarjylandyrý mehanizmi týraly aitqym keledi. Sońǵy jaǵdailarǵa bailanysty birden birneshe faktor áser etip, barlyq óńirlerde olar jumysyn toqtatty. Qazir kimniń kináli ekenin anyqtap otyratyn ýaqyt emes. Ol ákimdik pe, ministrlik pe, jetkizýshiler me nemese qazynashylyq pa, mańyzdy emes. Budan eń birinshi balalar zardap shegip otyr, sondyqtan biz bul máseleni múmkindiginshe tez sheshýimiz kerek. Alaida jumysty jedeldetý bizdi «sur shemamen» kúreste, ásirese «óli jandarmen» jumys isteitinder qarajat alýǵa tyrysqan kezde de jaýapkershilikten bosatpaidy. Qazir, ókinishke qarai, qarjylandyrý erejelerinde osyndai olqylyqtar kóp, biz ony jaqyn arada joiýǵa tyrysamyz. Qoǵamnan osynyń barlyǵyn qalpyna keltirýge sál ǵana ýaqyt berýin suraimyn», - dedi Dáýren Abaev.
Sondai-aq Dáýren Abaev Úkimettiń sportty damytý jónindegi is-sharalar josparyna engizilgen birqatar tásilder men is- sharalardy maquldaǵanyn aitty:
«Birinshi kezekte bul sport sektsiialarynyń sanyn arttyrý, sport nusqaýshylaryn kóbeitý, áýesqoi klýbtar jelisin keńeitý, sport ǵimarattaryn salý, sporttyq-buqaralyq is-sharalardy ótkizý jáne sportshylar men jattyqtyrýshylardy ómir boiy aisaiynǵy qamtamasyz etýdi ulǵaitý, sportshylardyń shtattyq sanyn turaqty túrde arttyrý jónindegi is -sharalar».
Ministr, búginde memleket sporttyq meditsinany damytýǵa jáne dopingke qarsy qatań saiasat júrgizýge, onyń ishinde halyqaralyq institýttar men zerthanalarmen yntymaqtastyqqa erekshe kóńil bóletinin atap aitty.
