Foto: QR MAM
Qazaqstan Respýblikasynyń Mádeniet jáne aqparat ministrligi belgili ánshi, Qazaqstannyń eńbek sińirgen qairatkeri Gúlzira Bókeihannyń dúnieden ótýine bailanysty marqumnyń otbasy men týǵan-týystaryna, sondai-aq barsha halqyna qaiǵyra kóńil aitty, dep habarlaidy Ult.kz.
Gúlzira Bókeihan qazaqtyń dástúrli án ónerin damytýǵa súbeli úles qosqan dara talant iesi boldy. Ol halyqtyq jáne kásibi kompozitorlardyń tańdaýly týyndylaryn joǵary sheberlikpen oryndap, ulttyq mádeni muramyzdy keńinen nasihattady. Sonymen qatar kóne halyq ánderin jańǵyrtyp, sirek mýzykalyq muralardy zamanaýi óńdeýmen sahnaǵa alyp shyqty.
Óner iesi Astana memlekettik filarmoniiasynda jáne Prezidenttik mádeniet ortalyǵynda qyzmet etip, sanaly ǵumyryn qazaq óneriniń abyroiyn asqaqtatýǵa arnady.
Ulttyq mádenietke ólsheýsiz eńbek sińirgen abzal jannyń jarqyn beinesi halyq jadynda máńgi saqtalady.
Marqumnyń jatqan jeri jaily, topyraǵy torqa bolsyn. Allanyń raqymy men meiirimi joldas bolyp, rýhy peiishte shalqysyn.
