Semeidiń Abai atyndaǵy qazaq melekettik mýzykalyq-drama teatrynda Qazaqstannyń eńbek sińirgen ártisi, qazaqtyń dástúrli ánderinde qaitalanbas qoltańbasy bar talantty ánshi Ramazan Stamǵaziev pen onyń ónerdegi de, ómirdegi de jarasym tapqan jary, "Qurmet" ordeniniń iegeri Ultý Qabaeva semeilikterdi ǵajaiyp áserge bólegen shyǵarmashylyq kontsertin berdi. Kesh barysynda kórermen oiynda qalǵan erekshe sátter de kóp bolǵanyn atap ótken jón. Aitalyq, Ultý ánshiniń kontsert bergen kúni óziniń týǵan kúnimen dóp kelip, semeilikter qýana qol soǵyp, tilektestigin bildirdi. Erli-zaiypty óner juldyzdarynyń kontsertine qoldaý bildirgen "AQShYŃ" korporatsiiasynyń prezidenti, belgili metsenat Marat Qurmanbai sahna tórine kóterilip, ánshige izgi tilegin bildirdi.
Óz kezeginde kóńili alaburtyp ǵajaiyp áserde turǵan Ultý ánshi kórermender arasynda aq jaýlyǵyn jamylyn,shýaqty júzinen meiirim shashyp otyrǵan asyl ana Rystyjamal Isehanqyzyn da 75 jasqa tolǵan mereitoiymen quttyqtap, tamasha án arnady. Sondai-aq jas talantty ánshi, kóptegen án baiqaýlarynda top jarǵan Aqjan Qurmanbai atty daryndy qyzdyń da salǵan áni boi shymyrlatty. Úkili bórik, oiýly qamzoly, uzynetek aq kóilegimen tamasha úilesim tapqan jas ánshi jerlesimiz qazirgi kúnde Qaraqat Ábildinanyń mektebinde tálim alyp júr.
Rasy kerek, semeilikter Ramazandai dástúrli ánniń dúldúlin saǵynyp qalypty. Joly túsip kelgen saiyn Semeidi qazaq án óneriniń altyn besigi dep qasterleitinin únemi aitatyn ánshi talantty sazger Tursynǵazy Rahimovtyń «Ániń qaida, Jánibek?» ánin oryndaǵanda qazaq ónerindegi eki tulǵanyń da (Jánibek Kármenov, Tursynǵazy Rahimov) beinesi saǵymdai buldyrap, saǵynyshty údetti. Al «Dariǵa-ai, dáýrendi» shyrqaǵanda kóńili tolqymaǵan kórermen kemde-kem bolǵanyna kúmán joq.
Anany ardaqtap, úlkendi qurmettep, Semeidi qasterlegen án juldyzdaryna qalalyq Mádeniet Saraiynyń direktory, ánshi Nuriden Imanbaev pen kontsert júrgizýshisi Oljas Soǵymbaev ulttyq ónerge shólirkegen jurtshylyq atynan tilektestik bildirip, arnaiy kádelerin tabys etti.
Sátjan QASYMJANULY,
Semei qalasy
