Túrkistan oblysynyń ákimi Darhan Satybaldy Qazyǵurt aýdanyndaǵy birneshe aýyl ókilderin arnaiy qabyldady. Maqsat – halyqtyń jer daýyna qatysty usynys-tilekterin tyńdaý. Kezdesýge jer salasyna qatysty mekeme basshylary, Qazyǵurt aýdanynyń ákimi Arman Abdýllaev qatysty.
Aldymen Jumysshy, Syntas jáne Qarabaý aýyly turǵyndary atynan kelgen azamattardyń ótinishteri tyńdaldy. Azamattar uzaq jyldarǵa sozylǵan jer daýynyń oń sheshimi tabylyp kele jatqanyn aita kele, endi sol qaitarylǵan jerdi aýyl turǵyndaryna ádil bólý máselesin kóterdi. Altyntóbe aýyly turǵyndarynyń da ótinishteri men usynystary hattamaǵa engizildi.
Turǵyndar kúrdeli máseleniń oblys basshylyǵynyń qoldaýymen halyqtyń paidasyna sheshilip jatqanyna rizashylyqtaryn bildirdi.
Oblys ákimi Darhan Satybaldy turǵyndarǵa árbir máseleni kelisip, aýyzbirshilikpen sheshý mańyzdy ekenin aitty.
«Ózderińiz bilesizder, birneshe aýylda jerdi aýdannyń menshigine ótkizý boiynsha júieli jumystar atqaryldy. Bul máseleni baqylaýda ustap otyrmyz. Endigi kezekte jerdi turǵyndarǵa bólip berý máselesin birjolata sheshken jón. Turǵyndar ózderi sheshim qabyldaidy. Bul isti birlikpen, yntymaqpen sheshken abzal. Sizderdiń usynystaryńyz eskerilip, halyq qoldaǵany tańdalady. Ekinshiden, ol jerdi qur alyp qoimai, igerý qajet. Biz sharýashylyqpen ainalysamyn, ónim shyǵaramyn deitin azamattarǵa qoldaý kórsetýge daiynbyz», – degen oblys ákimi aýdan basshysy Arman Abdýllaevqa osy jerge qatysty aýyl turǵyndarymen kezdesý ótkizip, komissiia quryp, ońtaily sheshýdi tapsyrdy.
«Túrkistan» áleýmettik kásipkerlik korparatsiiasynyń teńgeriminde qalǵan 209 gektar jerdi altyntóbelikterge bóli berýdi júktedi. Sondai - aq Ońtústik-Batys mal sharýashylyǵy jáne ósimdik sharýashylyǵy ǵylymi - zertteý institýtyna tiesili 89 ga sýarmaly egistik jer aýdannyń jer qoryna qaitarylmaq.
Túrkistan oblysynyń ákiminiń tapsyrmasyna sáikes, «Túrkistan» áleýmettik kásipkerlik korporatsiiasy» aktsionerlik qoǵamynyń direktorlar Keńesiniń 26.03.2022 jylǵy sheshimi negizinde Qazyǵurt aýdany, Altyntóbe aýyly okrýginde ornalasqan Qoǵam menshigindegi jalpy aýdany 15 547 ga jer ýchaskelerin Qazaqstan Respýblikasynyń Jer Kodeksiniń 82 babynyń talaptaryna sáikes jeke menshik quqyǵynan bas tartý arqyly Qazyǵurt aýdanynyń jer qoryna qaitarý týraly sheshimi shyǵarylǵan.
Altyntóbe aýyly okrýginde 5 aýyl ornalasqan. Zańnama talaptaryna sáikes, Qazyǵurt aýdan ákimdiginiń 10.10.2022 jylǵy №289 qaýlysymen 15547 gektar aýyl sharýashylyǵy maqsatyndaǵy jer ýchaskeleri aýdannyń arnaiy jer qoryna engizildi.
«Qarabaý» TÓSh» JShS-niń qaramaǵyndaǵy 4959,5 gektar egistik jerdi Syntas, Jumysshy, Qarabaý aýyldarynyń turǵyndaryna bólip berý máselesi boiynsha da oblys, aýdan ákimdikteri, tiisti basqarma jáne aýyl belsendileri tarapynan tiisti jumystar atqaryldy. Nátijesinde 27 qyrkúiekte QR Aýyl sharýashylyǵy vitse-ministri men ǵylymi zertteý institýtynyń basshysy elmen júzdesip, 491 gektar jerdi «Qarabaý» tuqym sharýashylyǵyna uryq óndirý úshin qaldyryp, 4468,5 gektar jerdi úsh eldi mekenniń halqyna bólip berý jóninde sheshim qabyldady.
Atalǵan máselege qatysty qujat tolyq rásimdelip, jer aýdan qoryna qaitarylǵan soń elge beriletin bolady.
Jer daýy birneshe jylǵa sozylǵan 8 aýylda 15 myńnan astam halyq turady. Qazyǵurt aýdanynyń arnaiy jer qoryna qaitarylǵan sýarmaly egistik jerler adam sany boiynsha úlestirilmek.
