Elimizde sý sporty túrlerin damytyp, Túrkistan qalasynda joǵary deńgeidegi jarystar ótkizý úshin salynǵan Orta Aziiada balamasy joq sporttyq keshenderi bar eskek esý kanaly qurylysynyń ekinshi kezeńi bastaldy. Oblys ortalyǵynda boi kótergen zamanaýi sport nysandarynyń qurylys barysymen tanysqan Túrkistan oblysynyń ákimi Darhan Satybaldy sport salasyn damytýǵa kúsh salynatynyn jáne bul baǵytta óńirge daryndy sportshylardy tartýdyń mańyzdylyǵyn aitty. Jaýapty sala basshylarymen kezdesip, qurylystyń sapasy men qaýipsizdigine basa nazar aýdarýdy tapsyrdy.
«Mundai zamanaýi sport keshenderi elimizde kóp emes. Biz halyqaralyq eskek esý kanalynyń múmkindigin tolyq paidalanyp, qazaq jastaryn sportqa baýlýymyz kerek. Sport – el abyroiyn asqaqtatý tetigi ǵana emes, ol – densaýlyq kepili. Óńirde sport salasyn damytýǵa barlyq jaǵdai jasalady», – dedi D. Satybaldy.
Olimpiadalyq ortalyq sáýlettik kórkimen ǵana emes, qalany kógaldandyryp, týrizmdi damytýǵa jáne óńirdiń atmosferasyn ózgertýge de múmkindik beredi. Túrkistan qalasyndaǵy ákimshilik-iskerlik ortalyǵynda salynǵan joba 100 gektarǵa jýyq alańda ornalalasqan. Uzyndyǵy 2,5 shaqyrymǵa sozylatyn sý arnasyna 2 mln. tekshe metr sý jinaldy. Sý tazartqysh qurylǵylar qoiylǵan.
Sport keshen qurylysynyń ekinshi kezeńinde munda ákimshilik ǵimaraty, qonaqúi, velojolaq, bassein, qaiyq turaqtary, jazǵy kinoteatr, araldy qosatyn kópir men basqa da nysandar boi kóteredi. Bul jerde sportshylar jaǵajai voleiboly men fýtboly, ashyq sýdaǵy júzý, triatlon, jelkendi sport, eskek esý, kanoe siiaqty sport túrlerinen jattyǵý jasaidy. Sý sport kesheni – aýqymdy joba.
Oblys ákimi qalalyq saiabaq ishinen salynyp jatqan jasandy kóldiń qurylys alańynda boldy. Demalys aýmaǵynyń jalpy aýdany – 13 ga jýyq. Keler jyly paidalanýǵa beriledi. Munda 4 uńǵyma arqyly sý jinalady. San alýan túri sýburqaqtar ornatylyp, ainalasy abattandyrylady.
Júieli túrde dene shynyqtyrýmen shuǵyldanatyn barlyq jastaǵy turǵyndardyń sanyn arttyrý úshin Túrkistan oblysynda jumystar júrgizilýde. Óńir basshysy Túrkistanda salynyp jatqan «Muz saraiynyń» qurylysymen tanysty. Álemdik standarttarǵa sai muz aidyny 1200 adamǵa eseptelgen. Munda qysqy sport túrlerinen úiirmeler ashylmaq.
Túrkistanda salynyp jatqan barlyq ǵimarattar qalanyń kórki ǵana emes, tarihi kelbeti men bolmysyn saqtai otyryp, zamanaýi arhitektýranyń ozyq jetistikterin paidalanýda. Ǵalymdar men kásibi mamandardyń pikiri eskerilip, tarihi kelbetin joǵaltpaýǵa basymdyq berilýde. Túrkistan qalasynda sondai-aq «Tennis ortalyǵy», Olimpiadalyq rezerv mektebiniń ákimshilik ǵimaraty men jataqhanasy, B.Sattarhanov sport kesheni, «At sporty kesheni» sekildi jańa sport nysandary ashylady.
