Túrkistan oblysynyń ákimi Darhan Satybaldy Túrki memleketter uiymy Bas hatshysynyń orynbasary Mirvohid Asimovpen jáne Hatshylyqtyń jobalyq direktorlary Erjan Mustafin, Shokirdjon Rahmatov, Ersin Aidoǵanmen kezdesti, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Mártebeli meimandar Túrkistan qalasynda 3-4 qazan aralyǵynda ótetin «Tabarrýk-Ziiarat» pilottyq jobasyn iske asyrý jónindegi forým jumysyna qatysý úshin arnaiy kelgen.
«Tabarrýk-Ziiarat» pilottyq jobasy ekijaqty yntymastyqty nyǵaityp, týrizm salasyn damytýǵa, týristter aǵynyn arttyrýǵa baǵyttylǵan. Óz kezeginde, atalǵan joba eki eldiń sonymen qatar, shekara mańyndaǵy óńirlerdiń ekonomikalyq damýyna oń serpin beredi.
Aita keteiik, týrizmdi damytý maqsatynda aǵymdaǵy jyly Ázerbaijanda Túrki memleketteri uiymyna (budan ári – TMU) múshe elderdiń týrizm ministrleriniń 7-shi otyrysy ótti. Onyń qorytyndysy boiynsha TMU hatshylyǵynyń, Qazaqstan men Ózbekstan delegatsiialarynyń qatysýymen «Tabarrýk-Ziiarat» pilottyq jobasyn ázirleý boiynsha úshjaqty kezdesý ótkizý kelisildi.
Jobany iske asyrý máselelerin odan ári pysyqtaý úshin aǵymdaǵy jyldyń 19 qyrkúieginde Qazaqstan men Ózbekstannyń múddeli memlekettik organdary men uiymdarynyń, TMU hatshylyǵynyń qatysýymen onlain keńes ótkizilgen. Óz kezeginde, Keńes qorytyndysy boiynsha «Tabarrýk-Ziiarat» pilottyq jobasyn iske asyrý jónindegi forým» sheńberinde jobany iske asyrý máselelerin odan ári talqylaý týraly sheshim qabyldandy.
Kelisimge sáikes pilottyq jobany júzege asyrý boiynsha máselelerdi talqylaý maqsatynda múddeli memlekettik organdar men biznes qaýymdastyqtyń qatysýymen forým aǵymdaǵy jyldyń 3-4 qazan aralyǵynda uiymdastyrylyp otyr.
Túrkistandaǵy Týrizm jáne meimandostyq ýniversitetinde ótetin Forýmǵa TMU-nyń ókilderi, Qazaqstan jáne Ózbekstan Respýblikasynyń týrizm ministrligi, keden qyzmeti, shekera qyzmeti, ishik ister qyzmeti men týristik qaýymdastyq ókilderi qatysady.
