Túrkistandaǵy jańa turǵyn úi keshenderi men jańa nysandardyń qurylysy bir sátke de toqtamaýy kerek. Ol úshin oblys ákimdigi tarapynan tiisti qoldaý kórsetiledi. Atap aitqanda, infraqurylym, qujattandyrý máseleleri nazarda bolady. Shahardaǵy qurylys nysandaryn kezekti ret aralaǵan oblys ákimi Darhan Satybaldy merdigerlermen kezdesip, jumystardy shiratýdy tapsyrdy. Ár nysannyń jumys barysyn baqylap, kesteden keshikpeýin qadaǵalady.
«Qurylys barysynda kezdesetin kedergilerdi aityńyzdar. Saralap, ákimdikke tiisti máselelerin jedel sheshýge ázirmiz. Turǵyn úi qurylysy óz ýaqytynda aiaqtalǵany jón. Óitkeni abattandyrý jumystary da josparǵa sai júrgizilýi kerek. Qurylys pen abatandyrý jumystary úilesimdi atqarylýǵa tiis», – degen Darhan Satybaldy árbir nysandaǵy jaýapty merdigermen sóilesti. Otandyq qurylys materialdaryna basymdyq berýdi tapsyrdy.
Óńir basshysy «Turan» fýtbol akademiiasynyń qurylys barysymen tanysty. Oblys fýtbolyn damytyp qana qoimai, respýblikalyq deńgeide oqý-jattyǵý ortalyǵyna ainalatyn bul nysan jeke investor esebinen salynyp jatyr. 10 fýtbol alańy, 300 oryndyq qonaqúii bar. Fýtbol alańdary iske qosylýǵa daiyn. Jalpy joba 2024 jyly tolyq júzege asady dep josparlanǵan. Degenmen infraqurylymy rettelse, joba erterek aiaqtalýy múmkin. Oblys ákimi infraqurylym máselesin retteýdi tapsyrdy.
Búginde oblys ortalyǵynda jeke investorlar esebinen salynǵan turǵyn úiler sany artqan. Óńir basshysy solardyń birqataryna bardy. Atap aitsaq, «Feb Turkestan», «Yassy Green House», «Park View Residence», «DEL&Invet» jáne ózge de kompaniialar salǵan turǵyn úi keshenderin aralap kórdi. Túrli sáýlet úlgisinde salynǵan úsh qabatty úiler jáne kottedjder Túrkistannyń ajaryn asha túspek. Oblys ákimi árbir úidiń qurylysy talapqa sai bolýyn eskertti. Búginde shaharda birneshe turǵyn úi kesheniniń qurylysy aiaqtalýǵa jaqyn. Olardyń birazy qazan aiynda tapsyrylsa, birneshe turǵyn úi kesheni jyl sońyna deiin ielelerine berilmek.
