Túrkistan óńirindegi oblystyq jáne aýdandyq mańyzy bar avtomobil joldarynyń jaqsy jáne qanaǵatty jaǵdaidaǵy úlesin biyl 92%-ǵa arttyrý josparlanǵan. Aita keteiik, 2018 jyly bul kórsetkish 72 %-dy quraǵan. Jalpy oblysta sapaly joldardyń úlesin 2025 jylǵa deiin 99,5%-ǵa jetkizý josparlanýda.
Túrkistan oblysyn áleýmettik-ekonomikalyq damytýdyń 2024 jylǵa deiingi keshendi jospary qaita bekitilip, jańadan qurylǵan oblys ortalyǵynda kólik infraqurylymyn damytý jumystary qarqyndy júrýde. Sonyń aiasynda «Túrkistan-Sháýildir» avtomobil jolynyń 70 shaqyrymyn qaita qurý kózdelgen. Qurylys barysymen tanysqan Túrkistan oblysynyń ákimi Darhan Satybaldy jumysshylarmen kezdesti. Ózekti máselelerdi pysyqtady.
Oblys ákimi basymdy baǵyt – asa mańyzdy joldarda bolatynyn aitty. Negizgi, eń qajetti degen avtojoldardyń tizimin daiyndaýdy júktep, jaýapty basshylarǵa naqty tapsyrmalar berdi.
«Avtomobil joldarynyń qurylysy men jóndeý jumystarynda asa mańyzdy baǵyttaǵy joldardyń qurylysyna basymdyq beriledi. Osy qaǵidany ustaný kerek. Respýblikalyq, oblystyq , aýdandyq jáne aýylishilik mańyzy bar joldar, iaǵni, barlyq deńgeidegi mańyzy bar, ýaqyt kúttirmeitin avtojoldardyń tizimin daiyndaý qajet. Kópten jóndeý kórmegen kúre joldar da jospardan tys qalmaýy tiis. Joldardyń qurylys sapasy – basty nazarda. Joldy salý da, jóndeý de bekitilgen kestege sáikes júrgizilýi kerek. Bul talaptardy saqtamandarǵa shara kóriledi», – dedi Túrkistan oblysynyń ákimi D.Satybaldy.
Túrkistan oblysynda avtomobil joldary men eldi meken kósheleriniń uzyndyǵy 17 509,5 shaqyrymdy quraidy. Biyl avtomobil joldary salasyn damytýǵa biýdjetten 53 mlrd. teńge bólinip, qurylys-jóndeý jumystarymen jalpy 767 nysan nemese 2 myń shaqyrymǵa jýyq joldar men kóshelerdi qamtý josparlanýda. Jyl qorytyndysymen 703 nysan nemese 1467,3 shaqyrym jol men kóshe paidalanýǵa tapsyrylady dep kózdelgen.
Qurylys, jóndeý jumystaryna Túrkistan oblysynyń jolaýshylar kóligi jáne avtomobil joldary basqarmasynyń tapsyrysymen turaqty túrde sapany baqylaý jumystary júrgizilip keledi.
