2020 jylǵa Senat josparlap otyrǵan sharalar toptamasy óte aýqymdy. Bul týraly Parlament Senatynyń tóraǵasy Dariǵa Nazarbaeva málim etti, dep habarlaidy "Ult aqparat".
«Sanaýly kúnderden keiin biz Táýelsizdik jylnamasynda erekshe iz qaldyrǵan mańyzdy oqiǵalarǵa toly 2019 jyldy tarih qoinaýyna shaǵaryp salamyz. Jalpy, jyl ishinde elimizdiń qoǵamdyq-saiasi jáne áleýmettik-ekonomikalyq ómiriniń jańa kezeńin zańnamalyq qamtamasyz etý boiynsha Senatta tyńǵylyqty jumystar atqaryldy. Osy kezeńde 83 zań jobasy jan-jaqty pysyqtalyp, mańyzdy zańdar qabyldandy. Tutastai alǵanda, qabyldanǵan zańdar Elbasy men Prezident aldymyzǵa qoiǵan mindetterdi júzege asyrýǵa, halqymyzdyń ómir súrý sapasyn odan ári jaqsartýǵa baǵyttalǵan», - dedi D. Nazarbaeva Senattyń jalpy otyrysynda.
Senat tóraǵasy kelesi jylǵa Senat josparlap otyrǵan sharalar toptamasy da óte aýqymdy ekenin atap ótti. Jeti parlamenttik tyńdaý, 70-ke jýyq mańyzdy máselelerdi talqylaýǵa arnalǵan úkimet saǵattary, konferentsiialar, dóńgelek ústel otyrystary men kezdesýler ótkizilmek.
«2020 jyldyń basynda aimaqtarǵa is-saparǵa shyǵasyzdar. Sizderge qazaqstandyqtarmen kezdesip, olardyń usynystaryn tyńdap, jaǵdailaryn bilip, múddeleri men úmitterin qoldaý júktelgen. Bul mańyzdy ári jaýapty missiia. Sizderdiń mindetterińiz - halyqqa Parlament qabyldaǵan sońǵy zańdar kúshine engende 1 qańtardan bastap qandai oń ózgerister bolatynyn qarapaiym tilde túsindirý. Ózderińiz biletindei, bul áleýmettik tólemder men memlekettik arnaiy járdemaqylar, kepildi áleýmettik paketter men kómekterge qatysty. Jańa mehanizm táýeldilikti toqtatyp, adamdardy jumys isteýge yntalandyrady. Jańa jyldan bastap mindetti meditsinalyq saqtandyrý iske qosylady», - dedi Senat spikeri depýtattarǵa qarata aitqan sózinde.
Osy oraida, Dariǵa Nazarbaeva is-saparlar kezinde birneshe mańyzdy máselege asa nazar aýdarýdy surady. Birinshiden, tirek jáne spýtniktik eldi mekender tizimine kirmegen aýyldyq eldi mekender jaǵdaiy nazarǵa alynady.
«Biz bul máselede óte muqiiat bolýymyz kerek, sebebi bul birneshe myń eldi mekenderde turatyn naqty adamdardyń taǵdyry», - dedi ol.
Ekinshiden, aqshalai járdemaqydan basqa, áleýmettik jaǵdaiy tómen otbasylardyń balalaryna kepildi áleýmettik paketke sáikes: azyq-túlik, kiim, oqý quraldaryn berý qarastyrylǵan. Jergilikti bilik ony qamtamasyz etýge qanshalyqty daiyn, osyny bilý kerek.
Úshinshiden, aýyldaǵy meditsinalyq qyzmetke qoljetimdilik pen bul qyzmetterdiń sapasy zerdelenedi. Tórtinshiden, jergilikti ózin-ózi basqarý organdarynyń qyzmetine ekpin qoiylady. Olar is júzinde qalai jumys isteidi, jeke biýdjetti basqarýǵa qanshalyqty daiyndyǵy zertteledi. Jergilikti basqarý organdarynda múmkindiginshe áielder sanyn arttyrý máselesi de mańyzdy mindet.
