Senatta Dariǵa Nazarbaeva astyq birlestikteriniń ókilderimen jumys babyndaǵy kezdesý ótkizdi. Bul jóninde Senattyń baspasóz qyzmetine silteme jasap "Ult aqparat" habarlaidy.
Qazaqstan Respýblikasy Parlamenti Senatynyń Tóraǵasy Dariǵa Nazarbaeva parlamenttik tyńdaýǵa daiyndyq aiasynda fermer odaqtary men agroónerkásip kesheni ónimderin óndirýshiler qaýymdastyqtarynyń basshylarymen birqatar jumys kezdesýlerin ótkizdi.
11 jeltoqsanda astyq birlestikteriniń ókilderimen kezdesý boldy. Oǵan aýyl sharýashylyǵy óndirýshileri tarapynan «Qazaqstan astyq odaǵy» zańdy tulǵalar birlestiginiń tóraǵasy N.Ospanov, osy mekemeniń atqarýshy direktory Sh.Badyhan, Qazaqstannyń astyq óńdeýshiler odaǵynyń prezidenti E.Gan jáne odaqtyń direktorlar keńesiniń múshesi D.Táýkebaev qatysty.
Sharaǵa Qazaqstan Respýblikasy Parlamenti Senatynyń depýtattary R.Ákimov, B.Elamanov, M.Jumaǵaziev, A.Nuraliev, M.Taǵymov jáne Á.Qurtaev qatysty.
Kezdesýde sóz alǵan «Qazaqstan astyq odaǵy» zańdy tulǵalar birlestiginiń tóraǵasy Nurlan Ospanov eldegi astyq óndirisin ulǵaitýǵa múmkindik beretin negizgi sebepterge toqtala kelip: aýyl sharýashylyǵy óndirýshileri shyǵyndardyń bir bóligi boiynsha memleket tarapynan ótemaqylardy qajet etetinin, sondai-aq agrotehnologiialar men tuqymdyq materialdy jaqsartý qajet ekenin jetkizdi.
Ósimdikterdi qorǵaityn kónergen quraldar týraly da aityldy.
«Bizde alqaptardyń lastaný deńgeii óte joǵary. Egin alqaptarynyń lastyǵy 30 paiyzǵa deiin ónimdi joiady. Eger ósimdikterdi qorǵaý quraldaryn qoldanbaityn bolsaq sapaly ónim ala almaimyz. Búgingi kúni bizdiń tizilim 90-shy jyldardan bastap engen dári-dármekterder turady. Jańa dáriler ýaqyt ótken saiyn az tirkelýde», - dedi N.Ospanov.
Qazaqstannyń astyq óńdeýshiler odaǵynyń prezidenti Evgenii Gannyń aitýynsha, eksporttaýshylardy qoldaý júiesiniń joqtyǵy naryqqa qatysýshylardyń kóbine zardabyn tigizip otyr.
«Qazaqstan tutynýdan artyq un eksporttaityn jalǵyz el bolýyna qaramastan, shikizat eksporttaýshylar áli kúnge deiin kóptegen qiyndyqtarǵa tap bolýda. Máselen, qosymsha qun salyǵyn qaitarý máselesi óte ótkir bolyp otyr, óitkeni táýekelderdi basqarý júiesi kez kelgen deńgeide tekserý júrgize alady», - dedi ol.
Kezdesýge qatysýshylar otandyq aýyl sharýashylyǵy tehnikasyn jinaý jáne ony kádege jaratý alymy, sondai-aq tariftik shekteýlerdi, ulttyq kompaniialardyń satyp alý saiasatynyń sapasy men dempingke qarsy baj máselelerin de qozǵady.
Senat Tóraǵasy Dariǵa Nazarbaeva kezdesýdi qorytyndylai kelip, astyq salasyn damytý jónindegi aýyl sharýashylyǵy salasy ókilderiniń usynystaryn 2020 jylǵa josparlanǵan parlamenttik tyńdaýlarǵa daiyndaý úshin Qazaqstan Respýblikasy Parlamenti Senatynyń Agrarlyq máseleler, tabiǵatty paidalaný jáne aýyldyq aýmaqtardy damytý komitetine jiberýdi ótindi.
