Elordada Álemdik jáne dástúrli dinder liderleri sezi XVIII hatshylyǵynyń otyrysy ótip jatyr. Otyrysqa QR Parlamenti Senatynyń tóraǵasy – Álemdik jáne dástúrli dinder liderleri sezi hatshylyǵynyń basshysy Dariǵa Nazarbaeva tóraǵalyq etýde, dep habarlaidy QazAqparat.
«Osy kúnderi Álemdik jáne dástúrli dinder liderleriniń birinshi sezi ótken kezden beri 16 jyl ótip otyr. Sol sátte qonaqjai qazaq jeri alǵash ret beibitshil, dostyq peiildi jáne jemisti konfessiiaaralyq dialogty júrgizý úshin ashyq alańǵa ainalǵan bolatyn. QR Tuńǵysh Prezidenti – Elbasy Nursultan Nazarbaev álemdik jáne dástúrli dinder liderleriniń sezin ótkizý ideiasynyń avtory boldy. Ótken jyldary Qazaqstannyń orasan zor iadrolyq qarý arsenalynan bas tartýyna bastamashy bolǵan, búkil álem moiyndaǵan bitimger, Táýelsizdik jyldary ishinde óńirlik qaýipsizdik pen turaqtylyqtyń tiregine ainalǵan eldiń basshysy Nursultan Nazarbaevtyń bastamasyn eń iri álemdik dinder men konfessiialardyń basshylary qoldady», - dedi otyrysty ashqan Senat spikeri.
Sonymen qatar, ol Elbasynyń konfessiiaaralyq dialog ótkizý týraly ideiasyn sol sátte barsha álem qyzý qoldaǵanyn eske saldy.
«Sodan beri Qazaqstannyń Tuńǵysh Prezidentiniń strategiialyq salmaqty ári kórgen bastamasy óziniń ózektiligin joǵaltqan emes. Jańa myńjyldyq basynda eń joǵary deńgeide konfessiiaaralyq ashyq dialog ótkizý naǵyz revoliýtsiialyq is edi. Al búgingi kúni iri álemdik konfessiialar basshylarynyń Eýraziia kindiginde kezdesýi izgi dástúrge ainaldy», - dedi Dariǵa Nazarbaeva.
Aita keteiik, búgingi otyrysta Álemdik jáne dástúrli dinder liderleriniń VI Sez qorytyndylary men Hatshylyq qyzmetiniń keleshegi týraly pikir almasylady. Sodan keiin 2021 jylǵy Álemdik jáne dástúrli dinder liderleriniń VII Sezin ótkizý boiynsha usynystar talqylanady.
