QR Ekologiia, geologiia jáne tabiǵi resýrstar ministrligi Orman sharýashylyǵy jáne janýarlar dúniesi komiteti tóraǵasynyń orynbasary Daniiar Turǵanbaev ulttyq tabiǵi saiabaqtarda maman tapshylyǵy bar ekenin másele etip kóterdi, dep habarlaidy QazAqparat.
«Ulttyq parkterdi qoqyspen lastaý máselesi shynymen ózekti. Bizdiń inspektorlar onymen ainalysyp jatyr. Ulttyq parkterdiń óz inspektorlary bar, aýmaqtyq inspektsiialardyń ókiletti inspektorlary bar. Olar osyǵan deiin qoqyspen kúresip kelgen, áli de kúrese beredi. Bul jerdegi jalǵyz másele – inspektorlardyń sany az. Qalai desek te, ishki týrizm artyp keledi. Ulttyq parkterge barýshylardyń úlesi kóbeiip jatyr. Inspektorlardyń ulttyq parkti qoqystan tazartýdan basqa da mindetteri kóp. Sondyqtan maman tapshylyǵy bar. Biz ulttyq saiabaqtarǵa kirgeni úshin alatyn tólemniń bir bóligin qosymsha jumys kúshin jaldaýǵa baǵyttaǵaly otyrmyz», - dedi ol Ortalyq kommýnikatsiialar qyzmetinde ótken brifingide.
Mamannyń málimeti boiynsha, eldegi ulttyq parkterdiń bárindegi inspektorlardyń sany 800-ge de jetpeidi.
«Eldegi ulttyq tabiǵi parkterde barlyǵy 750-800 inspektor bar. Bul inspektorlar tek týristik nysandardyń tazalyǵyn kúzetýmen shektelmeidi. Ulttyq parkterdiń eń kishisi 50 myń gektarǵa sozylyp jatsa, eń úlkenderi 700 myń gektarǵa deiin jaiylyp jatyr. Osy aýmaqtyń bárinde orman sharýashylyǵymen bailanysty basqa da jumystary bar. Iaǵni, 700 inspektor týristik nysandardan shyqpaidy degen túsinik bolmaýy kerek. Orman alqabyn qalpyna keltirý, órtten qorǵaý, ósimdikter men janýarlar álemin kúzetý siiaqty jumystary bar. Sondyqtan týristik nysandardaǵy inspektorlardyń jetispeitini ras», - dedi komitet tóraǵasynyń orynbasary.
