Olimpiada chempiony Daniiar Eleýsinov óziniń kásipqoi bokstaǵy birinshi jekpe-jegin Qytaida ótkizedi. Bul týraly MJA Entertainment's promoýterlik kompaniiasynyń basshysy Maik Altamýra Fighnews.com saityna bergen suhbatynda málimdedi.
Birinshi kezdesý mamyr aiynda Qytaida ótýi múmkin. Aqpanda Eleýsinov resmi túrde kelisimshartqa qol qoiady. Onyń promoýteri qazaqstandyq boksshyny eki jylda chempion etpekshi.
"Bizdiń josparymyz boiynsha, ol ekinshi ne úshinshi jekpe-jeginde óńirlik belbeý úshin judyryqtasatyn bolady, al eki jylda álem chempiony bolady, - deidi Altamýra. - Mundai daryn ielerin ustap otyrýdyń qajeti joq, birden kirisý kerek. Promoýter retinde men oǵan qajetti qadamdar jasaýǵa jáne az ýaqytta kásipqoi boksqa beiimdelýge múmkindik beremin. Men onyń 18 aida kásipqoi boksta tolyǵymen beiimdelip ketetinine senimdimin, al eki jyldan soń álem chempiony titýlyn jeńip alady degenge senemin".
Kásipqoi boksta Eleýsinov jartylai orta salmaqta óner kórsetedi (66 kelige deiin). Osy salmaqta eń basty qarsylastar tizimi jariialanǵan málimetterdi myna jerden oqi alasyz.
Daniiardyń aǵasy - 31 jastaǵy Dáýren Eleýsinov - áýesqoilar arasynda Qazaqstan chempiony bolǵan, 2014 jyly ol kásipqoi boksqa aýysqan. Qazirgi ýaqytta ol AQSh-ta alty kezdesý ótkizip beseýinde jeńgen (tórteýi - nokaýt), taǵy bir kezdesý teń aiaqtalǵan. Marat Eleýsinovtyń aitýynsha, Dáýren promoýterin aýystyryp kishi inisi óner kórsetetin kompaniianyń atynan shyǵady.
