Qazaqstannyń eńbek sińirgen sport sheberi, Rio Olimpiadasynyń jeńimpazy, kásipqoi bokstan álem chempiony Daniiar Eleýsinov Batys Qazaqstan oblysynyń qurmetti azamaty atandy, dep habarlaidy QazAqparat.
Týǵan jerine kelgen boksshyǵa qurmetti ataqty Qazaqstan chempionaty barysynda oblys ákimi Ǵali Esqaliev tabys etti.
Óńir basshysy Daniiardyń ákesi Marat Eleýsinovtiń baptaýymen boks shyńyn baǵyndyrǵanyn atap ótip, endi kásipqoi ringte de zor tabystarǵa jetýine tilektestigin bildirdi.
Daniiar Eleýsinov ózine kórsetilgen qurmet úshin alǵysyn aityp, aldaǵy ýaqytta da el úmitin aqtaý úshin bar kúsh-jigerin salatynyn málim etti.
Aita keteiik, osydan birneshe kún buryn Qazaqstan kásipqoi boksynyń jaryq juldyzy, Olimpiada chempiony Daniiar Eleýsinov IVO tujyrymy boiynsha álem chempiony atanǵan bolatyn.
