Daniiar Eleýsinov 20 táýlikke qamalyp, 7 jylǵa kólik júrgizý quqyǵynan aiyryldy, dep habarlaidy ult.kz.
Astanada sot boksshy Daniiar Eleýsinovke qatysty Ákimshilik quqyq buzýshylyq týraly kodekstiń 608-babynyń 3-bóligi («mas kúiinde kólik júrgizip, jol-kólik oqiǵasyna sebep bolý») boiynsha isti qarady.
Sot málimetinshe, Daniiar Eleýsinov alkogoldik masań kúide kólik tizgindep, elorda kóshelerinde úsh birdei jol-kólik oqiǵasyn jasaǵan.
Atap aitqanda, ol:
jerasty avtoturaǵy qaqpasynyń tiregine soǵylǵan;
bir avtokólikpen soqtyǵysyp, inertsiiamen taǵy bir kólikti qaǵyp ketken;
keiin Kia Sportage avtokóligimen soqtyǵysyp, soqqynyń saldarynan ol Toyota Hilux kóligine soǵylǵan.
Jol-kólik oqiǵalary saldarynan kólikter mehanikalyq zaqymdanyp, materialdyq shyǵyn keltirilgen.
Meditsinalyq kýálandyrý qorytyndysy boiynsha Daniiar Eleýsinovtiń jeńil dárejede alkogoldik masań kúide bolǵany anyqtaldy.
Sot sheshimimen ol 20 táýlikke ákimshilik qamaýǵa alynyp, 7 jyl merzimge kólik júrgizý quqyǵynan aiyryldy.
