Minsk Arenada ótip jatqan «Balalar Eýrovideniesi - 2018» baiqaýynyń qorytyndysy shyqty, dep habarlaidy "Ult aqparat".
Osy joly baiqaýǵa 20 elden jas oryndaýshylar qatysty. Bul vokaldyq konkýrsta Qazaqstan alǵash ret baq synaǵan-tyn.
Saitta berilgen daýystardyń barlyǵy eskerilip, olar upai retinde esepteldi. Kórermenniń onlain daýys berýi barysynda jinalǵan upailar - qatysýshyǵa berilgen baǵanyń jartysy ǵana, odan bólek ár elden kelgen ádilqazy alqasy (alqa quramynda 3 eresek, 2 bala bolady) da upai berip, konkýrsanttyń ónerin baǵalaǵan.
Finalda ár eldiń ókilderi ádilqazy alqasy músheleriniń qalai daýys bergenin jariialap otyrdy. Aitalyq, Qazaqstan óziniń 12 upaiyn (maksimaldy daýys sany) «Doma» ánin naqyshyna keltirip oryndaǵan makedoniialyq úmitker Mariia Spasovskaiaǵa berdi. Ádilqazylar bergen 68 upaimen qazaqstandyq Daneliia Tóleshova 8-orynda boldy.
Telekórermenderdiń daýys berý nátijesi boiynsha Daneliia 103 upai jinady. Bul kórermenniń daýys berý kórsetkishinde 3-oryndy bildiredi. Daýys sany men ádilqazy alqasy bergen upai sany boiynsha qazaqstandyq qatysýshy 171 upaimen 6-orynǵa turaqtady.
Birde-bir ádilqazy múshesi Qazaqstanǵa eń joǵary ball (12) qoimady.
Balalar Eýrovideniesi baiqaýynda bas júldeni 215 upai jinaǵan polshalyq Roksana Vengel jeńip aldy. Onyń ishinde 136 upai - kórermender bergen daýys sanynyń úlesi.
Atap ótsek, Belarýs astanasynda 16-shy "Balalar Evrovideniesi" baiqaýy ótti. Konkýrstyń on bes jyldyq tarihynda eń kóp jeńiske jetken Grýziia qatysýshylary – 3 ret, sonymen birge bul el ball sany boiynsha rekordtyq nátije kórsetipti — 239. Belarýs, Resei jáne Malta qatysýshylary eki-ekiden jeńimpaz atanǵan.
