10 jastaǵy almatylyq ánshi qyz Daneliia Týleshova Ýkrainada ótken «Golos. Diti» shoýynda jeńiske jetti, dep habarlaidy "Ult aqparat".
Ol baiqaýdyń finalynda áigili "Okean Elzi" tobynyń oryndaýyndaǵy "Ne tvoia viina" atty ánin shyrqap, kópshilikti tánti etti.
Kórermenderdiń daýys berýiniń nátijesinde Daneliia Týleshova birinshi oryndy ielenip, "Golos. Diti" tórtinshi maýsymynyń jeńimpazy atandy. Sonymen qatar, ol "eldiń eń úzdik balalar daýysy", "Nashe radio" radioarnasynda shyǵarmashylyǵyn rotatsiia jasaýǵa úsh ai múmkindik jáne Disneyland Paris demalysyna saiahat jasaýǵa joldama jeńip aldy.
«Golos» - ol meniń bala armanym. Adamdar meniń ánimdi tyńdaǵan kezde, kópshiligi maǵan hat jaza bastady. Senim bildirgenderińizge rahmet!», - dep qýanyshyn bólisti ánshi.
Daneliia sheteldik óner sahnasyna birinshi ret shyǵyp otyrǵan joq. Búǵan deiin ol, 2015 jyly «Jańa tolqyn» baiqaýynda kórermen kózaiymy júldesin alǵan.
Eske sala keteiik, almatylyq Daneliia Týleshova ýkrainalyq shoýdyń alǵashqy kúninde ataqty Demi Lovatonyń "Stone Cold" ánin oryndap, ádilqazylar men kórermenderdiń tańdaiyn qaqtyrǵan. Daneliia án sala bastaǵan sátte-aq qazylardyń barlyǵy oǵan burylǵan bolatyn.
Aita keteiik, Monatiktiń komandasynan finalǵa Daneliiamen birge Nino Basilaia shyqqan bolatyn. Otandasymyz final men sýperfinalda jalpy 5 án oryndady.
