«Habar» telearnasynyń tikelei efirinde «Balalar Evrovideniesi» baiqaýyna respýblikalyq irikteý finaly aiaqtaldy. Qazylar alqasy men kórermenderdiń daýys berý nátijesinde «Junior Eurovision Song Contest» halyqaralyq án baiqaýynda Qazaqstan namysyn Daneliia Tóleshova qorǵaityn boldy, dep habarlaidy QazAqparat tilshisi.
Finalda óńirlik irikteýlerden ótken 10 qatysýshy, atap aitqanda Maksim Erjan, Zere Ámirbekova, Meiirjan Jidebai, Mariia Zatvarnitskaia, Janelia Qaldybek, Dinar Nádirbekova, Asýat Sanat, Binýra Saýdabai, Daneliia Tóleshova, Súikim Qabylbek alǵash ret myńdaǵan kórermenniń aldynda án salǵan bolatyn. Jeńimpazdy tańdaý úshin kórermender ózderine unaǵan qatysýshyǵa sms joldaý nemese telefonmen habarlasý arqyly daýys berip, ádilqazylar alqasy da olardyń ónerin baǵalaǵan bolatyn.
Nátijesinde «Ózińe sen» ánin oryndaǵan Daneliia Tóleshova kórermender tarapynan 12, al ádil qazylardan 10 ball jinap, halyqaralyq baiqaýda baǵyn synaý múmkindigine ie boldy.
Esterińizge sala ketsek, almatylyq ánshi Daneliia Tóleshova Ýkrainada ótken «Golos. Diti» shoýynda jeńiske jetken bolatyn. Alǵashqy kezeńde ol "Stone Cold" ánin oryndap, barlyq qazylar alqasyna tánti etti. Daneliia osy ánin Youtube jelisinde 8 mln-ǵa jýyq adam kórgen. Al finalda «Ne tvoia voina» atty kompozitsiiany oryndap, kópshilikti tańdandyrdy. Arnaiy ataqpen birge Daneliia Tóleshovaǵa Disneyland Paris-de saiahattaýǵa joldama berildi.
Aita keteiik, «Junior Eurovision Song Contest» halyqaralyq án baiqaýy alǵash ret 2003 jyly Kopengagende (Daniia) 16 eldiń qatysýshysy arasynda ótti. Telekórermender men qazylar alqasynyń jeńimpazdy birlesip anyqtaýy 2008 jyldan bastap engizildi. Oǵan deiin kórermender tikelei kórsetilim kezinde daýys beretin. Ár jyldary baiqaýdy Belgiia, Rýmyniia, Niderlandy, Kipr, Ýkraina jáne t.b. elder uiymdastyrdy.
Al Resei, Grýziia, Belarýs jáne Malta eki ret jeńiske jetti. 2017 jylǵy Tbiliside ótken baiqaýda «Wings» ánimen reseilik 14 jastaǵy Polina Bogýsevich jeńimpaz atandy. Biyl baiqaýǵa 19 el qatysady. Olardyń qatarynda Albaniia, Armeniia, Avstraliia, Ázerbaijan, Belarýs, Frantsiia, Makedoniia, Grýziia, Irlandiia, Izrail, Italiia, Qazaqstan, Malta, Polsha, Portýgaliia, Resei, Serbiia, Niderlandy, Ýels bar. Qazaqstan men Ýels bul baiqaýǵa alǵash ret qatysady.
