Qazaqstandyq jas ánshi Daneliia Tóleshova amerikalyq «America's Got Talent» talanttar shoýynyń jartylai finalyna ótti, dep habarlaidy "Ult aqparat".
Tanymal álemdik shoýdyń shirek finaly bir kún buryn tikelei efirde ótti. Jartylai finalister kórermenderdiń daýysy arqyly tańdaldy. Daýys berý AQSh-taǵy NBC saitynda ótkizildi. Birneshe qatysýshy qazylar alqasynan qosymsha upai aldy.
«Los-Andjeleste meniń janymda anam jáne ustazym Nataliia Aleksandrovna bar. Biz sahnaǵa shyǵardyń aldynda qatty qobaljydyq. Men akademiialyq pedagog Gúlzat Daýrbaevamen qosymsha daiyndaldym. Aýyryp ta qaldym. Baqytymyzǵa orai, bári tez ótti. Barshańyzǵa rahmet! Qoldaý kórsetkenderińiz úshin alǵysym sheksiz. Men qazir qandai kúide turǵanymdy sózben aityp jetkize almaimyn. Keremet atmosfera! Shabyttandyrady eken. Men endi kelesi týrǵa daiyndalamyn», - dep bólisti Daneliia.
Búgin shoýǵa qatysýshylar baspasóz máslihatyn ótkizip, AQSh-tyń BAQ ókilderine suhbat beredi.
Esterińizge sala keteiik, shirek finalda qazaqstandyq 14 jasar juldyz Garri Stailzdyń «Sign of the Times» ánin tamasha oryndap shyqty. Oǵan kórermender men qazylar alqasy oryndarynan tik turyp qol soqty.
Sofiia Vergara jas ánshiniń ónerin joǵary baǵalady.
Daneliia, anasy jáne ustazy AQSh-qa birneshe kún buryn bardy. Shoýdyń barlyq qatysýshylary úshin mindetti shart - bul karantindik sharalardy qatań saqtaý.
«Biz ushar aldynda koronavirýsqa test tapsyrdyq. AQSh-qa kelgen soń basqa qatysýshylar siiaqty, mindetti karantin sharalaryn saqtadyq, taǵyda test tapsyrdyq. Biz qaýipsizdik sharalaryn qadaǵalaimyz, tipti qyzmet kórsetýde eshqandai bailanys bolmas úshin qonaqúidegi tamaq esikke jetkiziledi», - deidi Daneliianyń ustazy Nataliia Chýrakova.
«America’s Got Talent» jartylai finalynyń ýaqyty men qazaqstandyq juldyzdyń qandai kompoziiatsiia oryndaityny ázirge belgisiz.
