«Ile» oqý-jattyǵý poligonynda QR Qorǵanys ministri general-polkovnik Sáken Jasuzaqovtyń basshylyǵymen «Dala qyrany – 2017» halyqaralyq bitimgerlik taktikalyq-arnaiy oqý-jattyǵýynyń jabylý saltanaty ótti.
Sharaǵa jattyǵýǵa qatysýshy elderdiń ókilderi, onyń ishinde, áskeri-diplomatiialyq korpýs basshylary, NATO-nyń áskeri sarapshylary, sondai-aq Amerika Qurama Shtattarynyń, Ulybritaniia jáne Soltústik Irlandiia birikken Koroldiginiń, Tájikstan Respýblikasynyń jáne Qyrǵyz Respýblikasynyń baqylaýshylary qatysty.
Saltanatty rásimde sóz sóilegen QR Qorǵanys ministri: «Memleket basshysy Nursultan Nazarbaev BUU Qaýipsizdik Keńesine úndeýinde Qazaqstan BUU-nyń bitimgerlik júiesin odan ári jetildirýge múddeli jáne áskeri baqylaýshylar men beibitshilikti qoldaý boiynsha BUU missiiasyndaǵy bitimgerler sanyn ulǵaitýǵa nietti dep atap ótken bolatyn. Osyǵan bailanysty, biz birikken bitimgerlik daiyndyqtardy jalǵastyra beremiz. Búgingi «Dala qyrany» jattyǵýy osynyń jarqyn kórinisi bolyp tabylady, - dedi.
Qorǵanys vedomstvosynyń basshysy «Dala qyrany» halyqaralyq bitimgerlik taktikalyq-arnaiy oqý-jattyǵýyn ótkizý qatysýshy elderdiń yntymaqtastyǵyn nyǵaitý men jedel úilesimdilik deńgeiin arttyrýda mańyzdy qural bolyp otyrǵanyn atap ótti.
Óz kezeginde NATO Yntymaqtastyq jáne óńirlik qaýipsizdik basqarmasynyń direktory general-maior Ian Toft jattyǵýdy uiymdastyrýshylarǵa alǵysyn aityp, jattyǵý sheńberinde «Jedel áleýet tujyrymdamasy» baǵdarlamasy boiynsha standarttarǵa sáikestigin rastaǵan «Qazbat» qazaqstandyq bitimgerlik batalony jeke quramynyń daiyndyq deńgeiine NATO sarapshylarynyń bergen resmi oń baǵasyn jetkizdi.
«Dala qyrany» oqý-jattyǵýlary 2003 jyldan beri ótkizilip keledi. 2012 jyldan beri atalǵan jattyǵý keń kólemdegi qatysýshylardy tarta otyryp, «Beibitshilik úshin seriktestik» sheńberinde ótkizilýde.
