10 qarasha kúni Astana qalasynda qazaqstandyq mánerlep syrǵanaýshy Denis Tenge arnalǵan D10 WORLD atty kórme óz jumysyn bastaidy, dep habarlaidy "Ult aqparat" qala ákiminiń baspasóz qyzmetine silteme jasap.
MEGA Silk Way saýda oiyn-saýyq ortalyǵynyń ekinshi qabatynda jalpy aýdany 400 sharshy metrden asatyn aýmaqta avtorlyq fotojumystar, Denistiń mýzykasy jáne Olimpiada chempionyna tiesili zattar boiynsha jasalǵan muzdy álem dúniege keldi. Sonymen qatar, kórmede sportshyny ataýly is-sharalarda túsirgen túrli avtorlyq sýretter jáne áriptesteri men dostarynyń beine jobasy usynylǵan.
Kórme «Denis Ten Qorynyń» bastamasy boiynsha uiymdastyrylyp otyr. Qordy sportshynyń jaqyndary men týystary qurǵan. Qordyń maqsaty - Denis Ten atyndaǵy sporttyq-bilim berý baǵdarlamasyn uiymdastyra jáne damyta otyryp, Qazaqstandaǵy mánerlep syrǵanaý óneriniń, ásirese balalar men jastar arasynda damýyna súbeli úles qosý.
Qor Denistiń jeke jobalaryn jalǵastyryp, mánerlep syrǵanaý akademiiasyn ashýdy kózdep otyr. Odan bólek, Denis jazǵan stsenarii boiynsha film túsirip, Denistiń ánderimen mýzykalyq albom shyǵarmaq. Sondai-aq qor bastamasymen Denis Tenniń áńgimeleri men óleńderiniń jinaǵy basylyp shyǵady.
«Jalpy alǵanda, atalmysh qor qazaqstandyq mánerlep syrǵanaýshynyń shyǵarmashylyǵyna arnalǵan jobalardy saqtap, damytýdy maqsat etedi. Onyń jumysy daryndy jastardy qoldaýǵa, mádeniet, bilim berý, sport jáne áleýmettik jobalardy damytýǵa baǵyttalady» delingen habarlamada.
Kórme 10 qarasha kúni Qabanbai batyr dańǵylynda ornalasqan MEGA Silk Way saýda oiyn-saýyq ortalyǵynda ashylady.
