20 qyrkúiekte Qazaqstanda 2093 adamnyń analizinen koronavirýs anyqtaldy. Bul aldyńǵy kúnmen salystyrǵanda 345 adamǵa az. Keiingi aptalarda elde koronavirýstyń beti qaitqany baiqalady. Biraq kún saiyn ondaǵan adam ólimi tirkelip jatyr. Jaǵdaiy aýyr naýqastardyń sany áli myńnyń ainalasynda.
Dúisenbi kúni Almatyda – 415, Qaraǵandy oblysynda – 304, Almaty oblysynda – 254, Nur-Sultanda – 190, Pavlodar oblysynda 183 adamnyń PTR testi oń shyqqan. Qalǵan oblystar men qalalarda 150-den az naýqas tirkelgen.
Indet bastalǵaly beri 864 myń adamnyń PTR testi oń shyqqan. 10 810-i qaitys bolǵan. 19 qyrkúiekte 47 adam koronavirýstan qaitys boldy. Bul aldyńǵy kúnniń kórsetkishine qaraǵanda 10 adamǵa kóp.
Qazaqstanda koronavirýsqa uqsas pnevmoniiaǵa shaldyqqandar esebi 2020 jyldyń 1 tamyzynan beri júrgizilip keledi. Byltyr Qazaqstanda jazda jii kezdespeitin ókpeniń qabynýy órshigen kezde DDSU "ólim qaýpi joǵary qazaqstandyq pnevmoniia" – durys anyqtalmaǵan Covid dep málimdegen. Biraq soǵan qaramastan koronavirýs pnevmoniiasyna shaldyqqandar Covid statistikasyna engizilmedi.
2020 jyldyń tamyzynan beri elde 74 myń koronavirýs pnevmoniiasyna shaldyqqan. 4751 adam qaitys bolǵan. 19 qyrkúiekte 11 adam sodan kóz jumǵan.
Qazir 68 myń adam koronavirýstan emdelip jatyr. 12,3 myńy statsionarda jatyr. 987 adamnyń jaǵdaiy aýyr, 261 adamnyń jaǵdaiy tym aýyr. 143 naýqas jasandy tynys apparatyna qosylǵan.
Qazir Túrkistan, Mańǵystaý men Jambyl oblystary "jasyl aimaqta". Shymkent qalasy, Soltústik Qazaqstan, Batys Qazaqstan, Shyǵys Qazaqstan, Qyzylorda, Atyraý, Almaty oblystary "sary aimaqta". Nur-Sultan, Almaty qalalary, Aqmola, Aqtóbe, Qaraǵandy, Qostanai, Pavlodar oblystary "qyzyl aimaqta" tur.
Koronavirýsqa qarsy vaktsinanyń tolyq dozasyn alǵandar 6,2 mln adamǵa jetti. 1,1 mln adam ekinshi dozasyn kútip júr.
Indet bastalǵaly beri álemde koronavirýs juqtyrǵandar 229 mln adamǵa jetti. 4,6 mln adam qaitys boldy.
