Qazaqstanda bes myńnan astam Covid naýqasy tirkelip, 134 adam qaitys boldy. Bul týraly densaýlyq saqtaý ministrligi habarlady.
Ministrliktiń málimdeýinshe, 3 qyrkúiek kúni koronavirýs 4830 adamnan anyqtalǵan. Odan bir kún buryn virýs juqtyrǵany PTR testimen rastalǵan, biraq aýrý belgileri soǵan uqsas "kovidtekstes pnevmoniiamen" (KVI-) 316 adam tirkelgen.
Virýs juqtyrǵany PTR testimen rastalǵan (KVI+) naýqastary arasynda 98 kisi, "kovidteksten pnevmoniia" naýqastary arasynda 36 kisi qaitys bolǵan.
Resmi statistikaǵa qaraǵanda, Qazaqstanda koronavirýs indetiniń beti qaitqany baiqalady. Maýsymnyń sońynda elde koronavirýstyń "delta" varianty tirkeldi. Alǵash ret Úndistanda anyqtalǵan bul variant juqpalyǵy men naýqasty aýyr halge túsirý jyldamdyǵy boiynsha qaýiptirek sanalady.
Osy shtamm tirkelgenge deiin Qazaqstanda kúndelik tirkeletin naýqas sany 1,5 myńnan aspasa, "delta" kelgeli táýlik kórsetkishi úlken qarqynmen artyp, shildeniń ortasyna qarai 5 myńnan, sońynda 8 myńnan asty. Biraq tamyzdyń ortasynan bastap bul kórsetkish birtindep azaia bastady.
Indet ýshyqqan tusta eldiń epidemiialyq kartasynda óńirlerdiń bári "qyzyl aimaqta" bolǵan. Qazir Túrkistan oblysy "jasyl aimaqta"; Shyǵys Qazaqstan, Jambyl, Soltústik Qazaqstan oblystary - "sary aimaqta".
Qazaqstan úkimeti indetpen kúres joly retinde jappai vaktsinalaýǵa basymdyq berip otyr. Osy kúnge deiin elde 5,6 million adam Covid ekpesin tolyq aldy. Budan bólek, 1,2 millionǵa jýyq adam ekpeniń birinshi dozasyn alyp, ekinshisin kútip otyr.
Indet bastalǵaly Qazaqstanda barlyǵy 808 myńnan astam adamnyń analizinen koronavirýs anyqtalǵan. Al byltyr tamyzdan bastap eseptele bastaǵan "kovidtektes pnevmoniiaǵa" 71 myń adam shaldyqqan. Eki esepti qosa alǵanda, aýrýdan 15 myńnan astam adam qaitys bolǵan.
