11 qyrkúiek kúni Qazaqstanda 3575 adamnyń analizinen koronavirýs infektsiiasy anyqtaldy. Bul – 9 shildeden bergi eń tómengi kórsetkish. Sol kúni 3130 naýqas tirkelgen.
Buǵan deiin aimaqtar kóshin bastap kelgen Almaty qalasynda 869 naýqas anyqtalǵan. Shildeniń sońy men tamyzdyń basynda onda kún saiyn ortasha eseppen 1,5 myń naýqas tirkelip júrgen.
Tamyzdyń basynda kúndelik tirkeletin naýqastarynyń sany myńnan asyp júrgen Qaraǵandy oblysynda 11 qyrkúiek kúni 405 adamnyń PTR testi oń shyqqan.
Almaty oblysynda 332, Nur-Sultanda 316 jáne Pavlodar oblysynda bir kúnde 213 naýqas anyqtalǵan.
Qazaqstannyń epidemiialyq kartasynda Batys Qazaqstan oblysy "qyzyl" aimaqtan "sary aimaqqa" ótti. Endi onda BQO-men birge bes óńir bar. Olar: Jambyl, Qyzylorda, Shyǵys Qazaqstan jáne Soltústik Qazaqstan oblystary. "Jasyl" aimaqta burynǵysha Túrkistan oblysy ǵana tur. Qalǵandary túgel "qyzyl" aimaqta.
Maýsymnyń sońynda Qazaqstanda koronavirýstyń "delta" varianty tirkelip, elde indet qaita kúsh alǵan. Alǵash ret Úndistanda anyqtalǵan bul variant juqpalyǵy men adamdy aýyr halge túsirý qarqyny boiynsha edáýir qaýipti sanalady. Shildeniń sońy men tamyzdyń basynda indettiń taraýy sharyqtaý shegine jetip, kún saiyn 8 myńǵa tarta adamnyń analizinen Covid infektsiiasy anyqtalyp júrdi. Tamyzdyń sońynan bastap táýlik deregi birtindep azaiyp keledi.
Elde indet bastalǵaly barlyǵy 839 499 adamnyń PTR testi oń shyqqan. Onyń ishinde 10 297 kisi qaitys bolǵan. Buǵan koronavirýs juqtyrǵany rastalǵan, biraq ózge aýrýdan qaitys boldy degen 2633 adam kirmei qalǵan.
Qazaqstan munymen qatar 2020 jylǵy 1 tamyzdan bastap PTR testi teris shyqqan, biraq aýrý belgileri boiynsha koronavirýsqa uqsaityn "kovidtektes pnevmoniia" esebin júrgizip keledi. Osy kúnge deiin pnevmoniianyń bul túrimen 72 742 adam tirkelgen. Onyń ishinde 4664 adam aýrýdan aiyǵa almai qaitys bolǵan.
19 million halqy bar Qazaqstanda úkimet 10 million azamatqa koronavirýs vaktsinasyn salýdy kózdep otyr. Búginge keiin deiin ekpeni 5 million 893 myń 619 adam tolyq alǵan. Budan bólek, 1 million 178 myń 904 adam vaktsinanyń ekinshi dozasyn kútip otyr.
