Elimizdiń aimaqtarynda karantin talaptary jeńildetile bastady. Elorda men Almaty qalasyndaǵy shekteý sharalary áli de kúsheitile túsetin siiaqty. Óitkeni, koronovirýs infektsiiasyn juqtyrǵan azamattar sany tómendemei tur. Osy jáne ózge de aimaqtardaǵy ahýalǵa qysqasha sholý jasap kóreiik.
Nur-Sultan qalasynda karantin talaptary kúsheitiletin boldy. Óitkeni, bir táýlikte 118 adamnan koronovirýs infektsiiasy anyqtaldy. Qala qazir «qyzyl» aimaqta. Jaqyn kúnderi elordanyń bas sanitarlyq dárigeri arnaiy qaýly shyǵarmaq. Biraq blokpostar qoiylmaidy.
Bul týraly ákimdikte ótken jiynda belgili boldy. Alaida elordaǵa keletin nemese bas qaladan shyǵatyn jolaýshylar PTR-test tapsyrýǵa mindetti bolýy múmkin. Bas sanitarlyq dáriger turǵyndarǵa asa saq bolýdy eskertti. Sondyqtan, aldaǵy demalys kúnderi jurtty úide otyrýǵa shaqyrdy. Taǵy bir aita ketetin jait, elordadaǵy mektepterdiń barlyǵy qashyqtan oqytý rejimine kóshýi múmkin. Qalanyń bas sanitarlyq dárigeri osyndai málimdeme jasady.
Janna Pralievanyń aitýynsha, oqýshylar arasynda indet juqtyrý deregi jiilep ketken. Jańa oqý jyly bastalǵaly 224 baladan virýs anyqtalypty. Sondyqtan mamandar saqtaný kerektigin aityp otyr. Keshe aýdandyq sanitarlyq dárigerler qaladaǵy 20 mektepti ýaqytsha jabý týraly sheshim qabyldaǵan.
Almatydaǵy epidemiologiialyq jaǵdai kúrdeli kúiinde qalyp otyr. Bul týraly Óńirlik kommýnikatsiialar qyzmeti alańynda ótken onlain-brifing barysynda Almatynyń bas memlekettik sanitarlyq dárigeri Jandarbek Bekshin málimdedi.
Osyǵan bailanysty ol turǵyndardy qaýipsizdik sharalaryn ustanyp, sanitarlyq-epidemiologiialyq talaptardy saqtaýǵa shaqyrdy. Sonymen qatar, ol tek aldyn-alý sharalaryn jappai saqtaý arqyly aýrýdyń ósýine jáne qatań shekteý sharalarynyń engizilýine jol bermeý múmkin bolatynyn atap ótti. Álemdegi jaǵdaidyń ýshyǵa túskenin jáne megapoliste syrqattardyń kóbeiýi múmkin degen boljamdy eskere otyryp, ol turǵyndarǵa saqtyq sharalaryna salǵyrt qaramaýdy eskertti.
«Karantin rejimin ustanyp, kún saiyn aitylyp jatqan qarapaiym erejelerdi saqtaý kerek. Olardyń oryndalýyn jaqyndarymyzdan, týys-týǵandarymyzdan talap etý kerek. Betperde taǵyp, áleýmettik qashyqtyqty saqtap, adamdar jappai jinalatyn oryndarǵa, ásirese jabyq ǵimarattarǵa barmaý. Qoǵamdyq kólikke betperdesiz jáne qolǵapsyz kirmeý. Asa qajettilik týyndamasa, adam kóp jinalatyn oryndarǵa barmaý, jáne aýasy qiyn jeldetiletin jabyq mekemelerde kóp ýaqyt ótkizbeý. Syrtqy jabyndardy dezinfektsiialyq quraldarmen óńdeý. Qoldy jii jýý jáne balalardy jeke gigienany saqtaýǵa úiretý», - dep atap ótti Almatynyń sanitarlyq dárigeri.
Koronavirýs infektsiiasynyń taralý qaýpi jaǵynan «jasyl aimaqtaǵy» Batys Qazaqstan oblysynda epidemiologiialyq ahýal ázirge birqalypty. Osy aptada óńirde karantin talaptary jeńildetildi. Qoǵamdyq tamaqtaný oryndary 50 adamǵa deiin qabyldap jatyr. Bazarlar men saýda úileri kún saiyn ashyq. Avtobýstar demalys jáne mereke kúnderi de júredi. Tek sanitarlyq talaptar qatań saqtalýy tiis. Túngi saǵat 12-den tańǵy 6-ǵa deiingi aralyqta turǵyndardyń kóshege shyǵýyna shekteý qoiyldy. Jeltoqsan aiy bastalǵaly beri aimaqta 370 adam indet juqtyrǵan. Olardyń jartysynan kóbi Oral qalasynyń turǵyndary. Al Jánibek jáne Qaratóbe aýdandarynda bir de bir jaǵdai tirkelmegen.
14 jeltoqsannan bastap Petropavl qalasynyń aýmaǵyndaǵy blokpostar alynady. Iaǵni, aldaǵy dúisenbiden bastap óńirde karantin talaptary jeńildeidi. Qoǵamdyq kólikterdiń demalys kúnderde júrýine ruqsat etilip otyr. Munymen qosa oblystaǵy barlyq avtostantsiia ashylyp, aýdan, aýyldarǵa avtobýstar qatynaidy. Dini nysandar, kitaphanalar, murajailar men teatrlar qaita ashylady. Sporttyq nysandar, basseinder jáne balalarǵa bilim berý mekemelerine senbi kúnderi jumysyn jalǵastyrýǵa ruqsat etildi. Óńirde epidemiologiialyq ahýal turaqtalyp keledi. Qazir oblys «sary aimaqta».
Esterińizge sala keteiik, qarashanyń 9-ynan bastap, qala karantinge jabylyp, turǵyndardyń PTsR test anyqtamasynsyz kirip shyǵýlaryna tyiym salynǵan bolatyn.
Qyzylordadaǵy saýda ortalyqtary men kinoteatrlar jeksenbi jáne mereke kúnderi de jumys isteitin boldy. Oblystyń bas memlekettik sanitarlyq dárigeriniń qaýlysyna sáikes kásipkerlik nysandardyń qyzmet kórsetý kestesine ózgeris engizildi. Oiyn-saýyq ortalyqtary, saýda-sattyq jelileri, azyq-túlik emes jáne jabyq bazarlar buǵan deiin tańǵy 10:00-den keshki 22:00-ge deiin jumys istegen edi. Endi olardyń tutynýshyny qabyldaý ýaqyty 1 saǵatqa uzardy. Bul ózgeristerdiń kinoteatrlar men qoǵamdyq tamaqtaný nysandaryna da qatysy bar. Atalǵan nysandardyń barlyǵyna jeksenbi jáne mereke kúnderi saǵat 10:00-den 17:00-ge deiin jumys isteýine ruqsat berildi.
Balqash qalasyndaǵy ortalyq aýrýhana bazasynda PTR-zerthana ashyldy, dep habarlaidy oblystyń densaýlyq saqtaý basqarmasy.
Táýligine 500 synaq ótkize alady. Balqash, Priozersk, Aqtoǵai jáne Shet aýdandarynyń turǵyndaryna qyzmet kórsetedi. Jalpy alǵanda, bul shamamen 130 myń adam. Mekeme barlyq talaptarǵa sai jáne germaniialyq jabdyqtarmen jaraqtalǵan. Úi-jailarda jóndeý jumystary júrgizildi, tehnika ornatyldy, qajetti reaktivter satyp alyndy. Zerthana qyzmetkerleri Qaraǵandynyń jetekshi zerthanalary bazasynda arnaiy oqytýdan ótken. Jobanyń jalpy quny 39 mln teńge. Buryn PTR zertteýge barlyq biologiialyq materialdar Balqashtan Qaraǵandyǵa jiberiletin. Nátijelerdi alý úshin 3 kúnnen 5 kúnge deiin ýaqyt qajet bolatyn. Endi jańa PTR zerthanasy arqyly koronavirýs infektsiiasyn tez arada anyqtaýǵa bolady. Taldaýdy óńdeýge ortasha eseppen 5 saǵat ýaqyt ketedi. Nátije bir táýlik ishinde beriledi.
