30 qyrkúiekke deiin koronavirýs infektsiiasyn emdeýge arnalǵan dári-dármektiń eki ailyq qory qurylady. Bul týraly «SQ-Farmatsiia» kompaniiasy málimdedi, dep habarlaidy "Ult aqparat".
Koronavirýstyq infektsiianyń ekinshi tolqynyna daiyndyq aiasynda Qazaqstandaǵy Biryńǵai distribiýtor respýblikalyq jáne jergilikti deńgeilerde dári-dármek satyp alý jáne turaqtandyrý qorlaryn qalyptastyrý jumystaryn jalǵastyrýda.
«Memleket basshysynyń tapsyrmalaryn iske asyrý aiasynda dárilik zattardy sapaly josparlaý jáne satyp alý boiynsha sharalar qabyldandy. Sertifikattaý men tirkeý rásimderi jáne bir jolǵy ákelý rásimderi jeńildep, dári-dármekti sertifikattaý rásimderi 1 aidan 3 kúnge deiin qysqartyldy. COVID-19 emdeýge arnalǵan jańa preparattardy tirkeý rásimi 6 aidan 2 aiǵa deiin jedeldetildi, el dárihanalaryna 10 mln astam dárilik zattar jetkizildi», - dep habarlady SQ-Farmatsiia.
Odan bólek, ambýlatoriialyq deńgeide dárilik preparattar tizbesi keńeitildi – 8,6 mlrd teńgege 1 mln adamǵa arnalǵan 5 dári túrin qamtityn COVID -19 nozologiiasy engizildi. Qazirgi ýaqytta dári-dármek meditsinalyq uiymdarǵa jiberilip, naýqastarǵa taratyla bastady.
Búgingi kúni respýblikanyń barlyq meditsinalyq uiymy dárilik zattardyń bir ailyq kólemimen qamtamasyz etilgen. 30 qyrkúiekke deiin koronavirýstyq infektsiiany emdeýge arnalǵan dári-dármektiń eki ailyq qory qurylady.
«SQ-Farmatsiia» JShS bazasynda Respýblikalyq turaqtandyrý qory men 11 óńirlik turaqtandyrý qory quryldy. Máselen, Almaty qalasynda 5 mlrd teńgeniń, Nur-Sultanda 1,2 mlrd teńgeniń turaqtandyrý qory bar.
1,2 mln diagnostikalyq PTR testi kóleminde rezerv quryldy. COVID -19 zerthanalyq diagnostikasynyń táýliktik áleýeti 59 memlekettik jáne jeke menshik uiymǵa artty. Osylaisha, testileý qýaty, qajet bolǵan jaǵdaida 1 qyrkúiekten bastap táýligine 64 myńǵa deiin jetedi.
