Qazaqstandyq mamandar nanotehnologiiaǵa negizdep jasaǵan 2 vaktsinany Dúniejúzilik densaýlyq saqtaý uiymy tirkeýge aldy, dep habarlaidy "Ult aqparat".
M.Aiqymbaev atyndaǵy asa qaýipti infektsiialar ulttyq ǵylymi ortalyǵynyń Facebook-tegi paraqshasynda osyndai aqparat jariialandy.
«Seriktesterimizge, Qazaq ulttyq agrarlyq zertteý ýniversitetiniń ujymyna jáne rektoryna, Ulttyq Ǵylym akademiiasynyń akademigi, professor Espolov Tilektes Isabaiulyna COVID-19 pandemiiasymen kúreske baǵyttalǵan ǵylymi zertteýlerdi tolyq qoldaǵany úshin alǵys bildiremiz. Osy ýaqytqa deiin QazUAÝ halyqaralyq vaktsinologiia ortalyǵynyń direktory Tabynov Qaisardyń jetekshiligimen birikken zertteý toby ortalyq referenttik zerthana bazasynda 2020 jyldyń maýsym jáne jeltoqsan ailarynda SARS-CoV-2 virýsynyń 12-ge jýyq shtamyn bólip shyǵardy. Jaqynda ǵana birlesken zertteý tobynyń jedel jáne úilesimdi jumysynyń arqasynda Qazaqstan aýmaǵynda tirkelgen britandyq jáne ońtústik afrikalyq shtamdarǵa tán SARS-CoV-2 virýsynyń mýtatsiialary salystyrmaly túrde qysqa merzimde rastaldy. Qazirgi ýaqytta atalǵan virýstardy bólý boiynsha jumystar júrgizilýde. Bul virýstardyń bolýy bizdiń ǵalymdarymyzǵa COVID-19-ǵa qarsy otandyq, sondai-aq sheteldik vaktsinalyq jáne dárilik preparattardyń tiimdiligin baǵalaýǵa múmkindik beredi», - jazylǵan áleýmettik jelide jariialanǵan málimette.
Ortalyq mamandary atalǵan shtamdardyń bar ekenin der kezinde anyqtaý mýtatsiialardyń kóptep taralýyna jol bermeý úshin óte mańyzdy ekenin aitady.
«Búgingi tańda eki vaktsina alyndy. Olar – nanoemýlsiialyq mai adiývantyna negizdelgen sýbýnittik vaktsina jáne nanobólshekterge negizdelgen vaktsina. Dúniejúzilik densaýlyq saqtaý uiymy olardy Naruvax-C19 jáne NARUVAX-C19/Nano degen ataýmen «kandidat vaktsinalardyń» tizilimine engizdi. Qazirgi tańda bul ekpeler bizdiń ǵylymi ortalyqta janýarlarǵa synalyp jatyr. Iaǵni, klinikaǵa deiingi SPF-zertteýleriniń sońǵy kezeńinen ótýde», - delingen ortalyqtyń resmi aqparatynda.
