Koronavirýsty juqtyryp, bir aiǵa jýyq qatty aýyrǵan Petropavl turǵyny Oksana Kropacheva basynan ótken jaǵdaidy aityp berdi, dep habarlaidy QazAqparat.
Petropavldyń 35 jastaǵy turǵyny Oksana Kropachevanyń aitýynsha, ol birinshi ret koronavirýsty 2020 jyldyń shilde aiynda juqtyrǵan.
«Biz qyzym ekeýimiz Ombydaǵy meditsinalyq ortalyqtardyń birinde tekserilýimiz qajet boldy. Shekaradan PTR test nátijesinsiz ótkizbedi. Al sol kezde bul testi jasatý qat edi. Men ótý úshin meditsinalyq mekemelerge jii baryp turdym, sol jerde juqtyrdym dep oilaimyn. Óitkeni, onda men siiaqty kezek kútip júrgen adamdar kóp boldy», - deidi Oksana Kropacheva.
Ol kezde aýrý jeńil ótip, áiel gazdalǵan sýsyndardyń jáne kei jemis-jidektiń dámin sezbegen. Tapsyrǵan testii qyzy ekeýinde de oń nátije kórsetip, eki ai úi karantininde otyrady.
«Qarasha aiynda ekinshi ret aýyrdym. Aldymen búiregimniń qysymy kóterildi. Buǵan deiin búiregim múldem aýyrǵan emes. Ózimdi jaisyz sezindim. Búiregimniń qysymy túsisimen dene qyzýym kóterildi. Men otyryp-turýdan qaldym. Jótel bastaldy. Bir ereksheligi – jótelgende aýzymnan kóbik shyǵatyn. Dárigerdi shaqyryp, tekserile bastadym. Tekserýge qan ala almady, ol uii berdi. Trombotsittiń joǵary bolýynan, qan tamyrlary tarylyp, qan ainalymy nasharlady. Saldarynan basym aýyryp, janym kózime kórindi. Múldem dám, iis sezýden qaldym. Sol sebepti tamaq ishe almadym, loqsyp, qusýmen boldym», - deidi kelinshek.
Oksananyń tanysy sonyń aldynda ǵana koronavirýs juqtyryp, saldarynan búiregi jumys istemei qalǵan eken. Kóp ýaqyt ótpei komaǵa túsip, qaitys bolǵan.
«Ne júre almaisyń, ne jata almaisyń, ne tamaq ishe almaisyń – bul óte qorqynyshty. Buǵan deiin jarty jyl boiy men koronavirýstyń bar ekenine, onyń qaýipti ekenine mán bermesem, aýyrǵanda bir ai esimdi jiia almadym. Onyń saldaryn áli tartyp kelem, qazirdiń ózinde maǵan demalý qiyn. Tamaǵym ise beredi, jótelden de tolyq qutylǵan joqpyn», - deidi Petropavl turǵyny.
COVID-19-dy juqtyryp, qaýipti infektsiianyń bar zardabyn tartqan áieldiń búginde turmys salty ózgergen. Jańa ádetterdi qalyptasyrýyna týra kelipti.
«Qazir qoǵamdyq oryndarda maskamdy tastamaimyn. Qolymdy sabyndap jýyp otyrýdy ádetke ainaldyrdym. Taýardy úige jetkizip beretinderdiń qyzmetine júginýge tyrysamyn. Al dúkenge baratyn bolsam adam az ýaqytty tańdaimyn. Óitkeni men qorqamyn. Men ólip qalsam balalarym ne isteidi, ananyń ornyn eshkim baspaidy. Áli kúnge deiin bul virýstyń barlyǵyna senbeitinder bar. Men de solardyń biri bolǵam. Bul – óte qorqynyshty aýrý, saqtansań saqtaimyn degen, sanitarlyq talaptardy saqtaiyq», - deidi Oksana Kropacheva.
