Qazaqstandyq Zýlfiia Chinshanlo Ózbekstan Respýblikasynyń táýelsizdigi kúnine arnalǵan Aýyr atletikadan halyqaralyq kýbokta ekinshi oryn ielendi, dep habarlaidy Sports.kz saity.
Týrnir onlain rejimde ótip jatyr.
55 kelige deiingi salmaq dárejesinde Ózbekstan sportshysy Mýattar Nabieva qos saiys nátijesinde 205 kelini (95+110) eńserip, jeńimpaz atandy.
Chinshanlo julqa kóterýden áriptesine ese jiberse, serpe kóterýden oǵan jeter eshkim bolmady (115 keli). Alǵashqy úshtikti polshalyq sportshy Ioanna Lohovskaia (80+105) tuiyqtady.
Eske salaiyq, saiystyń shartyna sáikes sportshylar dodaǵa úiden nemese jattyǵý ortalyǵynan qatysa alady. Uiymdastyrýshylar jattyǵý oryndaý men videoqondyrǵyny ornatý boiynsha birqatar erejelerdi bekitti. Alaida bul Kýbok tehnikalyq jarys erejelerine sáikes kelmegendikten, onyń nátijelerin, sonyń ishinde jańa rekordtardy halyqaralyq aýyr atletika qoǵamdastyǵy resmi moiyndamaidy.
