Chehiia prezidenti Milosh Zeman 10 qazanda aýrýhananyń jansaqtaý bólimine tústi. Bul týraly jergilikti basylymdar jazyp jatyr. Oqiǵa elde parlament sailaýy ótken kúnniń ertesine bolǵan.
Zeman qala syrtyndaǵy rezidentsiiasynan Pragaǵa jetkizilgen. Videoda prezidenttiń sulq jatqany kórinedi. Zemandy emdep jatqan maman ári aýrýhananyń bas dárigeri prezidenttiń jasaqtaý bólimine túskenin rastady. Biraq diagnozyn aitpady.
Buǵan deiin 77 jastaǵy prezidenttiń baýyry aýyratyny habarlanǵan. Qyrkúiektiń ortasynda ol aýrýhanaǵa jatyp shyqqan edi. Sodan keiin Zeman jurt aldyna shyqqan joq. Sailaýda da rezidentsiiasynan daýys berdi.
Zemannyń densaýlyǵy ózine premer-ministr ári saiasi seriktesi Andrei Babish kelip ketkennen keiin nasharlaǵan. Sailaý qorytyndysyna sáikes, Babishtyń partiiasy parlamentte kóp oryn alǵanymen, óz betinshe ministrler kabinetin jasaqtai almaidy.
Qazir eki oppozitsiialyq koalitsiia arasynda jańa úkimet týraly kelissóz júrip jatyr. Jańa premer-ministrdi taǵaiyndaý prezidenttiń quzyrynda. Eger parlament ol tańdaǵan kandidatty eki ret keri qaitarsa, onda bul quqyq parlament jetekshisine ótedi.
Prezident uzaq ýaqyt óz qyzmet mindetin atqara almasa, parlament ony qyzmetinen shettete alady.
