12 shildede Ankara reseilik C-400 áskeri zymyran kesheniniń alǵashqy partiiasyn qabyldap, aldaǵy ýaqytta qalǵan bóligi jetkiziletinin habarlady. Sarapshylar AQSh pen Túrkiia arasyndaǵy qarym-qatynastyń nasharlaǵanyn aitady.
AQSh ákimshiligi keshenniń jetkizilýine bailanysty pikirin aitqan joq. Vashingtonnyń yqtimal áreketteri jaily baspasóz máslihaty keiinge shegerilgen.
AQSh qorǵanys ministriniń mindetin atqarýshy Mark Esper túrkiialyq áriptesi Hýlýsi Akarmen jarty saǵat boiy telefonmen sóilesken, alaida Pentagon áńgimeniń jai-japsaryn aitýdan bas tartty.
"Akar amerikalyq áriptesine Túrkiia áýe jáne zymyran qorǵanys júiesine zárý, osyndai zárýliktiń sebebinen C-400 satyp alyndy". Túrkiianyń qorǵanys ministrligi Akar men Esper arasyndaǵy áńgime aýanyn qysqasha osylai jetkizdi.
Quny shamamen 2,5 milliard dollar bolatyn reseilik C-400 áskeri zymyran keshenin satyp alý týraly kelisimge Máskeý men Ankara 2017 jyly qol qoiǵan. Bastypqyda Túrkiiaǵa reseilik áskeri zymyran keshenderi 2020 jyly jetkiziledi dep josparlanǵan. Biraq eki tarap alǵashqy keshendi 2019 jyldyń shilde aiynda jetkizý týraly kelisken.
Bul kelisim Túrkiia men AQSh arasyndaǵy qarym-qatynasqa salqynyn tigizdi. Vashington NATO paidalanyp kele jatqan F-35 áskeri ushaǵy jaily qupiia derek Kremldiń qolyna túsýi múmkin dep qaýiptengen. AQSh sonymen birge C-400 kesheni NATO-nyń zymyranǵa qarsy qorǵanys júiesimen sáikes kelmeitinin de alǵa tartqan. AQSh senaty eger Túrkiia C-400 keshenin ornalastyrsa, oǵan qarsy sanktsiia salatynyn eskertken.
