Sybailas jemqorlyqqa qarsy qyzmet kvazimemlekettik kompaniialardyń bank depozitterine milliardtaǵan biýdjet qarajatyn negizsiz ornalastyrý faktisin tekserip jatyr, dep habarlaidy "Ult aqparat".
«Kórsetilgen qarajattar naqty memlekettik baǵdarlamalardy iske asyrý úshin bólingen. Alaida kvazimemlekettik sektor olardy maqsaty boiynsha qoldanýdyń ornyna depozittik shottarǵa ornalastyrý arqyly minimaldy passivtik kiris alyp otyrǵan», - dedi búgin elordada ótken baspasóz máslihatynda Sybailas jemqorlyqqa qarsy is-qimyl agenttigi seriktestik departamentiniń bas sarapshysy Symbat Israpýlova.
Bul jaǵdai memlekettik baǵdarlamalardyń ýaqtyly jáne sapaly iske asyrylýyna teris áser etken.
«Kvazimemlekettik sektordyń jekelegen laýazymdy tulǵalary osy jaǵdaidy jeke paida tabý úshin zańsyz paidalanyp otyrǵany tergeýde anyqtaldy. Iaǵni 2017-2018 jyldary Aýy lsharýashylyǵy ministrligi «Agrarlyq nesie korporatsiia» AQ Basqarma tóraǵasy Narmuhan Sarybaevtyń basshylyǵymen banktiń depozittik salymyna 5,3 mlrd teńge somasynda aqshalai qarajat ornalastyrylǵan. Sarybaev júieli túrde jáne birneshe transhpen kelisim agenti retinde shyǵyp, depozitti tartqany úshin 53,5 mln teńge mólsherinde bank syiaqysyn alǵan jeke tulǵadan 11 mln teńge kóleminde para alǵan», - dedi ol.
Agenttik ókiliniń aitýynsha, 2019 jyly N. Sarybaev «Ońtústik aimaqtyq investitsiialyq ortalyǵy» JShS Basqarma tóraǵasy bolyp sailanǵannan keiin (quryltaishysy Túrkistan oblysynyń ákimdigi) osyǵan uqsas syzbamen ekinshi deńgeili banktiń depozittik shotyna 1 mlrd teńge ornalastyrǵan. Ol úshin júieli túrde 1,5 mln teńge kóleminde para alǵan.
«Qazirgi ýaqytta Sarybaev Nur-Sultan qalasynyń tergeý izoliatoryna qamaýǵa alyndy. Sot oǵan qatysty 2 ai merzimge kúzetpen ustaý túrinde bultartpaý sharasyn sanktsiialady. Agroónerkásip kesheniniń sýbektilerin sýbsidiialaǵany úshin para alý derekteri, sonymen qatar basqa da adamdardyń qatystylyǵy tekserilýde», - dedi ol.
Aita keteiik, «Agrarlyq nesie korporatsiia» AQ «QazAgro» Ulttyq basqarýshy holdinginiń enshiles uiymy. «Agrarlyq nesie korporatsiiasyna» qatysty tergeýdiń bastalǵanyn buǵan deiin Sybailas jemqorlyqqa qarsy is-qimyl agenttiginiń tóraǵasy Alik Shpekbaev málim etken bolatyn.
«Búgingi kúni Agenttik «QazAgro» UK enshiles uiymy «Agrarlyq nesie korporatsiiasy» AQ-ǵa qatysty tergeý júrgizýde. Onyń basshylyǵy zańsyz syiaqy alý úshin Hoým Kredit bankindegi depozitke aýyl kásipkerlerin jeńildikpen nesielendirýge baǵyttalǵan 11 mlrd teńgeni salǵan. Bul bir bank boiynsha ǵana jaǵdai. Tekserý jumystary endi ǵana bastalǵanyn aitqym keledi», - dedi ol.
