Shyǵys Qazaqstan oblysynda meditsinalyq mekemelerdiń materialdyq-tehnikalyq bazasyn nyǵaitýǵa erekshe kóńil bólindi, dep habarlaidy "Ult aqparat".
Oblys ákimi Danial Ahmetov halyq aldynda esep berý barysynda 8,3 mlrd teńgege qosymsha 174 ÓJJ apparaty, 10 rentgen-apparaty, 3 EKMO, 3 kompiýterlik tomograf jáne zamanaýi jabdyqtarmen jabdyqtalǵan 216 jedel járdem kóliginiń satyp alynǵanyn aitty. Sonymen qatar qomaqty qarajat densaýlyq saqtaý nysandaryn jóndeýge jáne olardyń qurylysyna da bólingen. Jalpy ótken jyly óńirdiń densaýlyq saqtaý salasyna 37,3 mlrd teńge jumyldyryldy.
«Qazirgi tańda koronavirýs juqtyrǵandarǵa ýaqtyly jáne sapaly meditsinalyq kómek kórsetý maqsatynda 41 infektsiialyq statsionar jumys istep tur. Tolyqtai jabdyqtalǵan 6 300 tósek-oryn uiymdastyrylǵan. Alǵashqy virýs juqtyrý faktisi tirkelgen sátten bastap birinshi statsionarlardaǵy tósek-oryn sany 12 esege artty», - dedi aimaq basshysy.
Halyqty PTR-zertteýlermen qamtýdy ulǵaitý úshin oblysta táýligine jalpy qýaty 16 myń synamany quraityn 22 zerthana bar. Sondai-aq immýndyq plazmany daiyndaý boiynsha kúrdeli jumystar júrgizilýde. Donorlyqqa 7 myń adam tartylyp, ártúrli qan toptarynyń 4 myń dozasy daiyndaldy. Onyń 1000-nan astam dozasy karonavirýsqa shaldyqqan patsientterge quiyldy.
«Pandemiiamen kúreske qaramastan, jetekshi sheteldik klinikalarda mamandardy oqytý jalǵasýda. Ótken jyly álemdik deńgeidegi 5 sheberlik-saǵaty ótkizilip, iadrolyq meditsina ortalyǵynyń, Altai men Aiagóz insýlt ortalyqtarynyń, ana men bala ortalyǵy janyndaǵy ońaltý bólimshesiniń dárigerleri óz biliktilikterin arttyrdy. Jobany iske asyrý bastalǵannan beri 5,5 myńnan astam maman oqytyldy», - dedi Danial Ahmetov.
