Ýkrainadaǵy soǵysta ólgen beibit adam sany segiz myńnan asqan. Bul aqparat Birikken Ulttar Uiymynyń Adam quqyǵy jónindegi joǵarǵy komissary basqarmasynyń aqpandaǵy baiandamasynda aitylǵan. Muny "Bi-bi-sidiń" Orys qyzmeti habarlady.
"21 580 adam ártúrli jaǵdaida habar-osharsyz ketken, onyń 8101-i ólgen. Ólgenderdiń ishinde 2127 áiel men 488 bala bar" dep jazylǵan baiandamada.
"Kópshiligi áýe soqqylary kezinde, úlken aýmaqqa jaiylatyn jarylǵysh zattardan, aýyr artilleriiamen atqylaýdan, dúrkindetip atatyn, jappai qyryp-joiatyn reaktiv júie zymyrandary túskennen qaza tapqan" dep habarlaidy "Bi-bi-si".
BUU Adam quqyǵy jónindegi joǵary komissary basqarmasy Ýkrainadaǵy beibit adamdar ahýaly týraly aiyna bir ret baiandama jasaidy. Onyń árbirinde sóz "ólgeni naqty qujatqa túsken adamdar týraly" ekeni aitylady. Beibit adamdar arasynda ólgender budan áldeqaida kóp bolýy múmkin. Óitkeni tolassyz urys júrip jatqan eldi mekenderden (Mariýpol, Severodonetsk, Lisichansk, Soledar jáne Bahmýt) tolyq aqparat alý múmkin emes.
Ýkrainadaǵy soǵysta Resei áskerileri beibit adamdardy jappai óltirgeni birneshe ret anyqtalǵan. 2022 jylǵy naýryzda Ýkrina áskeri azat etken Býcha jáne Irpen qalalarynda 700-den astam beibit adamnyń máiiti tabylǵan. Sol aida Resei Mariýpol drama teatryn bombalap, sonda panalap otyrǵan 300-den astam adam ólgen. Resei Kramatorsk vokzalyn zymyranmen atqanda, 50 adam, Chasov Iar qalasyndaǵy kópqabatty úidi atqylaǵanda, 48 adam, Dneprdegi turǵyn úidi atqylaǵanda, 40-tan astam adam ólgen.
