Dúniejúzilik azyq-túlik baǵdarlamasynyń málimetinshe, Madagaskardyń ońtústiginde millionnan astam adam klimattyń jahandyq ózgerýinen týyndaǵan álem tarihyndaǵy alǵashqy ashtyq jaǵdaiynda tiri qalý úshin jantalasyp jatyr. Bul jaiynda BUU-nyń jańalyqtar ortalyǵy málim etti, dep habarlaidy QazAqparat.
Madagaskar - kólemi jaǵynan álemdegi tórtinshi aral sanalady jáne ǵalamnyń basqa esh jerinde kezdespeitin ósimdikteri men jan-janýarlary bar biregei ekojúiege ie. Aralda ádette qurǵaqshylyq mamyrdan bastap qazan aiyna deiin sozylady. Al qarashada jaýyn-shashyn bastalatyn. Biraq, klimattyń jahandyq ózgerýi jergilikti turǵyndardyń daǵdylanǵan tsiklin tolyqtai buzdy.
«Árine, jaýyn-shashyn aitarlyqtai azaidy. Jańbyr bastalǵanda jergilikti turǵyndardyń úmiti oianady. Biraq, artynan ol qysqa ǵana jaýyn bolyp shyǵyp, arty qaitadan qurǵaqshylyqqa ulasady. Osylai jyldan jylǵa qaitalanyp keledi. Sondyqtan adamdardyń azyq-túlik qoryn tolyqtyrýǵa eshteńesi joq», - dedi Dúniejúzilik azyq-túlik baǵdarlamasynyń ókili Elis Rahmýn.
Elis Rahmýn taiaýda Madagaskardyń ońtústiginde bolǵan. Bul óńirdegi júzdegen myń jergilikti turǵynǵa BUU men onyń seriktesteri kómek kórsetip jatyr.
«Keibir óńirlerinde turǵyndar áli de bolsa eginshilikpen ainalysa alady. Biraq jaǵdai jyldan jylǵa qiyndap barady. Al keibir óńirinde múldem eshteńe óspeidi. Sondyqtan adamdar shegirtke, jemis-jidek jáne kaktýs japyraǵymen kúneltýge májbúr. Kaktýs japyraǵy burynyraqta iri qara mal azyǵy retinde ǵana paidalanylatyn. Adamdar ony esh ýaqytta jegen emes», - dedi ol.
Onyń atap ótýinshe, aral turǵyndaryna kómek kórsetilmese, onda taiaý jyldarda ashtyqqa ushyraǵandar sany geometriialyq progrespen arta túsedi. Sondyqtan Dúniejúzilik azyq-túlik baǵdarlamasy keler jyldyń sáýirine deiin Madagaskardyń million turǵynyna qoldaý kórsetpek. Sol úshin 70 million dollar jinaýǵa kirisip otyr.
