Qazaqstan energetika ministriniń burynǵy orynbasary Anatolii Shkarýpanyń ústinen qozǵalǵan qylmystyq is 6 qarashada Qaraǵandy oblysyndaǵy Saran qalasy sotyna tústi. Shkarýpaǵa Qylmystyq kodekstiń "Senip tapsyrylǵan asa iri kólemdegi bóten múlikti iemdenip alý nemese talan-tarajǵa salý" baby boiynsha aiyp taǵylyp otyr. Onymen birge taǵy eki adamǵa - buryn turǵyn úi-kommýnaldyq sharýashylyǵyn damytý qory basqarmasynyń tóraǵasy mindetin atqarǵan Qaisar Baidaly men ENERCO kompaniiasynyń direktory Erlan Nabievke de aiyp taǵylǵan.
Tergeý boljamy boiynsha, Anatolii Shkarýpa Qaraǵandy oblysy Saran qalasynyń ákimi bolǵan tusta ortalyq jylý jelisi men qazandyǵy joq qaladaǵy turǵyn úilerge "jylý esepteýge arnalǵan aspaptardy satyp alý jáne ornatý úshin" turǵyn úi-kommýnaldyq sharýashylyǵyn damytý qoryna biýdjetten bólingen aqsha qoldy bolǵan. Tergeýshiler atalǵan qor ENERCO kompaniiasyna 215 million teńgeden astam qarjyny zańsyz aýdarǵan dep sanaidy.
Advokatynyń aitýynsha, 44 jastaǵy Anatolii Shkarýpa ózine taǵylǵan aiyptardy joqqa shyǵarady. Onyń advokattary qylmystyq istiń sotta qaralýyn anyqtaý máselesi boiynsha barlyq taraptyń qatysýymen aldyn ala tyńdaý taǵaiyndaýyn surap 6 qarashada Saran sotyna ótinish bergen. Qorǵaýshylar istiń Nur-Sultanda qaralǵanyn qalaidy.
- Tergeý bastaýǵa eshqandai negiz bolǵan joq. Jylý esepteýge arnalǵan aspaptar sol kezde de, qazir de tiisti jerde – Saran qalasyndaǵy kóppáterli úilerde tur. Qylmystyq is materialdaryna sáikes, barlyǵy óz ornynda tur. Eger taraptardyń barlyǵy óz mindettemelerin jetkilikti shamada oryndasa, al ishinara oryndalmaýyna atqarýshy emes, qazandyq salmaǵan úshinshi tarap kináli bolsa, qandai urlyq týraly aitýǵa bolady? Qazaqstandaǵy kóppáterli turǵyn úilerge jylý esepteitin aspaptar el prezidentiniń tapsyrmasymen ornatyldy. Shkarýpa memleket sheneýnigi retinde ondai zań aktilerin oryndaýǵa mindetti bolatyn. Mundai jylý esepteitin aspaptar ornatý qylmysqa jatpaidy, – dedi Shkarýpanyń advokaty Nurlan Beisekeev.
2018 jyly qazanda Qazaqstan energetika ministriniń orynbasary bolyp taǵaiyndalǵan Anatolii Shkarýpa sol jylǵy qarashada tutqyndalǵan. Shkarýpaǵa deiin osy qyzmetti atqarǵan Baqytjan Jaqsaliev 2018 jyly shildede Aqmola oblysy aýmaǵyndaǵy shipajaida kóldi tazartý jobasynda bolǵan yqtimal sybailas jemqorlyqty tergeý aiasynda kúdikti retinde úiqamaqqa alynǵan. Byltyr 7 qarashada Aqordada ótken Qaýipsizdik keńesiniń otyrysynda sol kezdegi bas prokýror Qairat Qojamjarov Anatolii Shkarýpanyń Saran ákimi bolǵan kezde "biýdjetten 215 million teńgeni jymqyrýǵa qatysy bar" dep málimdegen. Shkarýpa 2014 jyldan 2017 jylǵy mamyrǵa deiin Qaraǵandy oblysy Saran qalasynyń ákimi bolǵan. Keiin Qaraǵandy oblysy ákiminiń energetika, turǵy úi-kommýnaldyq sharýashylyq jáne tótenshe jaǵdailar máseleleri boiynsha orynbasary bolyp istegen.
