Elordada burynǵy energetika ministriniń orynbasary Ǵani Sádibekov pen Baqytjan Jaqsalievke qatysty sot otyrysy jalǵasýda, dep habarlaidy "Ult aqparat".
Sot otyrysy barysynda Energetika ministrliginiń qaldyqtardy basqarý departamenti direktorynyń burynǵy orynbasary Bizar Dosmaqova kútpegen málimdeme jasady. Onyń kýáligi boiynsha, B.Jaqsaliev Shýche-Býrabai aimaǵyndaǵy kólderdi tazartý boiynsha jasalǵan jumystarǵa memlekettik saraptamanyń oń qorytyndysynsyz qol qoiylǵanyn bilgen. Is boiynsha kýáger bul máseleler Energetika ministrliginiń apparattyq keńesterinde jii kóterilgenin atap ótti.
«Tazartý jumystary 2015 jyly (qyrkúiek-qazan) júrgizildi. Jumys barysynda «Aimaq jáne K» JShS shotyna 800 mln teńge aýdaryldy. Memlekettik satyp alý týraly kelisim-shart aiasynda Jaqsaliev jumys aktilerine qol qoidy. Oryndalǵan jumys aktisi tundyrylǵan shógindiler kólemine sáikes kelmegenin Jaqsalievtiń ózi de biletin», - dedi Dosmaqova sot otyrysy barysynda.
Sondai-aq, basty kýágerlerdiń biri burynǵy energetika vitse-ministri Jaqsaliev 2015 jyly Shýche-Býrabai aimaǵyndaǵy kólderdi tazartý baǵdarlamasynyń úilestirýshisi bolǵanyn jáne onyń oryndalýyna jaýapty bolǵanyn aitty.
Jaýap bergen kýágerdiń aqparatyna sáikes, Energetika vitse-ministri Baqytjan Jaqsaliev Shýche-Býrabai kýrorttyq aimaǵyndaǵy kóldegi jumystardy 2015 jyldyń tamyzynan bastap baqylap keledi.
Sonymen birge, tenderdi jeńip alǵan kompaniia sý qoimasyn tazartýǵa arnalǵan nemis jabdyqtaryn ákelgeni belgili boldy.
Qylmystyq materialdarǵa sáikes, bul qylmystyń izin jasyrý jáne jumys barysyna zańdy sipat berý úshin jasalǵan.
«Jalpy, 2015 jylǵy 21 qyrkúiekten bastap qazannyń aiaǵyna deiin aktilerde kórsetilgen 109 myń tonnanyń ornyna, kól túbinen tek 3,5 myń tonna tunba shógindileri shyǵarylǵan. Jaqsalievtiń «jetekshilik etý» kezeńinde qylmystyq toptyń qylmystyq áreketterinen memleketke 746 million teńge kóleminde materialdyq zalal keltirilgen», - delingen tergeý málimetinde.
Aita ketsek, kýáger B.Dosmaqovadan úsh kún boiy jaýap alynǵan edi. Aiyptalýshylardyń qorǵaýshylary oǵan birneshe ret suraq qoiyp, Dosmaqova jaýap berdi.
Sonymen birge, aiyptaýshy tarap B.Dosmaqovanyń aiǵaqtaryn qoldai otyryp, sottan kýá men burynǵy vitse-ministr B.Jaqsaliev arasyndaǵy aýdio jazbany tyńdaýdy ótindi. Alaida aiyptalýshylardyń advokattary belgisiz sebeptermen ony tyńdatýǵa úzildi-kesildi qarsy bolyp otyr.
