Dúniejúzine tanymal búrkitshi qyz Aisholpandy AQSh-tyń Garvard pen Ulybritaniianyń Oksford ýniversitetine oqýǵa shaqyrdy. Biraq ol shetelge barý úshin arnaiy daiyndyq kýrsynan ótýi kerek, dep xabarlaidy QazAqparat tilshisi.
«Bilim-Innovatsiia» xalyqaralyq qoǵamdyq qorynyń prezidenti Darxan Óte Ermaxanulynyń aitýynsha, Aisholpan Astanadaǵy Spectrum xalyqaralyq mektebinde oqi alady. Oǵan 20 myń dollar da bólinedi.
«Endi, Garvardqa barý úshin daiyndyq kerek qoi. Til jaǵynan jáne taǵysyn taǵy. Aqshasy daiyn. Anasy Mońǵoliiaǵa barǵannan keiin ákesimen aqyldasamyz dedi. AQSh-qa baratyn bolsa, aldymen Astanaǵa kelip, bir jyldai osynda daiyndalady», - dedi Darhan Óte Ermaxanuly QazAqparat tilshisine bergen suxbatynda.
Aisholpannyń anasy Almagúl Kóksegen de osy aqparatty rastady. Onyń sózine qaraǵanda, byltyr Aisholpanǵa sheteldiń birneshe ýniversiteti shaqyrý jibergen.
«Iá, biz áli Mońǵoliiaǵa baryp aqyldasamyz. Aisholpan aldymen Astanaǵa keledi. Osy jerde daiyndalady. Sodan keiin shetelge oqýǵa barady», - deidi A.Kóksegen.
Al Aisholpannyń ózi Garvardty tańdaǵanyn jetkizdi.
«Men Garvardty tańdadym. Sol jaqqa baryp, oqyǵym keledi», - dep atap kórsetti A.Nurǵaiypqyzy.
Aita keteiik, búgin Astanada «Qazaqstan» RTRK tapsyrysy boiynsha túsirilgen «Kóshpendiler» atty derekti filmge arnalǵan baspasóz máslixaty ótti. Oǵan búrkitshi qyz Aisholpan Nurǵaiypqyzy da keldi. Ol atalǵan filmniń alǵashqy seriiasyna túsken. «Qazaqstan» RTRK basqarma tóraǵasy Erlan Karinniń aitýynsha, atalǵan jobanyń negizgi maqsaty - shetelge qonys aýdarǵan qandastyrymyzdyń ómiri men turmys-saltyn kópshilikke kórsetý.
«Filmde Mońǵoliia, Aýǵanstan, Qytai, Túrkiia, Iran jáne taǵy basqa da memleketterde turatyn qazaqtardyń taǵdyry jaiynda baiandalady. Ony túsirý ońaiǵa túspedi. Sebebi, texnikany aparý kerek. Túsirý jumystaryn aldyn ala kelisý kerek jáne taǵysyn taǵy. Bir ret Iranda jergilikti politsiia túsirý tobynyń texnikasyn tárkiledi. Degenmen, biz óz jobamyzdy oidaǵydai jasap shyqtyq. «Kóshpendiler» derekti filmder toptamasy ulttyq arna efirinen 14 qazannan bastap 23 jeltoqsanǵa deiin kórsetiledi», - deidi E.Karin.
Al Aisholpan qusbegilik ónerine qalai qyzyǵyp, qai ýaqyttan bastap ainalysqanyn aityp berdi.
«Qazaqstandaǵy jarystarǵa kelýge daiynmyn», - deidi Aisholpan.
Mońǵoliiada turatyn qazaq qyzy Aisholpan Nurǵaiypqyzy 13 jasynda búrkitshiler jarysynda jeńimpaz atandy. Ol jaiynda aǵylshynnyń «Daily Mail» basylymy da jazdy. Al rejisser Otto Bell "Búrkishi qyz" atty derekti filmdi túsirdi. Atalǵan týyndy Oskar syilyǵyna usynylǵan bolatyn.
Sol kezde film avtorlary túsirilim jumystaryn qalai júrgizgenin aityp bergen edi.
Al Avstraliia ánshisi Siia Ferler «Angel by the Wings» atty ánine klip shyǵardy. Atalǵan shyǵarma Mońǵoliiadaǵy búrkitshi qazaq qyzy Aisholpan Nurǵaiypqyzy týraly derekti filmniń resmi saýndtregi bolyp sanalady.
