IQanat High School of Burabay mektebinde sanitarlyq karantin talaptarynyń buzylý faktisi boiynsha jospardan tys tekserý bastaldy, dep habarlaidy "Ult aqparat".
Esterińizge sala ketsek, áleýmettik jelide atalǵan sharada mektep oqýshylarynyń jáne óze de qatysýshylardyń maskasyz ári áleýmettik araqashyqtyqty saqtamai túsken sýreti áleýmettik jelide taraǵan bolatyn.
Osyǵan orai elimizdiń bas memlekettik sanitar dárigeri Aijan Esmaǵambetova bul faktini biletindigin jáne kináliler jazalanatyndyǵyn aitqan edi. Sál keiinirek Aqmola oblystyq taýarlar men kórsetiletin qyzmetterdiń sapasyn jáne qaýipsizdigin baqylaý departamenti óńirlik politsiia departamentimen birlesip, sanitarlyq karantin talaptaryn buzý faktisi boiynsha IQanat High School of Burabay mektebinde jospardan tys tekserý bastaǵany belgili boldy.
Bul jaiynda QR DSM Taýarlar men kórsetiletin qyzmetterdiń sapasyn jáne qaýipsizdigi baqylaý komitetinen málim etti.
«Tekserý qorytyndysy boiynsha Qazaqstan Respýblikasy bas memlekettik sanitar dárigeriniń jáne Aqmola oblysy bas sanitar dárigeriniń qaýlysy talaptaryn buzýǵa jol bergen zańdy jáne jeke tulǵalarǵa QR Ákimshilik kodeksi 425-baby 1-tarmaǵymen ákimshilik áreket etý sharalary qoldanylatyn bolady. Buǵan qosa, adamdar kóp jinalǵan atalǵan sharanyń Aqmola oblystyq taýarlar men kórsetiletin qyzmetterdiń sapasyn jáne qaýipsizdigin baqylaý departamentimen, Býrabai aýmaqtyq basqarmasymen aldyn ala kelisilmegendigin habarlaimyz» delingen vedomstvo aqparatynda.
QR Bilim jáne ǵylym ministrligi de oryn alǵan osy jaitqa orai túsinikteme berdi.
«Bul - biregei mektep. Metsenattar onyń qurylysyna jeke qarajatyn saldy. Bul mektepte aýyldan shyqqan, ótkizilgen olimpiada qorytyndysynan iriktep alynǵan daryndy balalar tegin bilim alady. Mektep ákimshiligi oqýshylar men mekteptiń pedagogikalyq personaly COVID-19-ǵa 2 ret test tapsyrǵanyn, meditsina qyzmetkerleriniń baqylaýymen eki apta oqshaýlaýdan ótkendigin habarlady. Sonymen qatar mektep oqýshylary birinshi toqsan boiy PTR-testin oqtyn-oqtyn tapsyryp otyrady», - dedi Bilim ministrliginen.
Ministrlik málimetinshe, mekteptiń ózi aýyldyq jerde ornalasqan jáne eldi mekennen oqshaýlandyrylǵan.
«Balalar sol jerde jatyp oqidy. Mekteptiń ashylýyna QR Bilim jáne ǵylym ministrliginiń ókilderi shaqyrylǵan. Metsenattar aýyldan shyqqan talantty balalardyń bilim alýy úshin basqa da óńirlerde osyndai mektepter ashýdy josparlap otyr», - dedi vedomstvodan.
