Búldirshinniń erkeligin kótere almaǵan tárbieshi balany soqqyǵa jyqty, dep habarlaidy Almaty.tv tilshisi.
Almatydaǵy jekemenshik balabaqshalardyń birinde bolǵan oqiǵadan keiin ata-analar balalaryn bóbekjaiǵa jibermei jatyr. Áleýmettik jelide taraǵan beinejazba balabaqshanyń beinebaqylaý kamerasynan alynǵan. Onda tárbieshiniń búldirshindi basynan shapalaqpen uryp jibergeni anyq kórinip tur. Bóbekjai meńgerýshisi tiisti shara qoldanyldy deidi. 6 jasar balany urǵan adam jumysqa tárbieshiniń kómekshisi bolyp ornalasqan eken.
«Statia boiynsha jumystan shyǵardyq. Endi ákimshilik tergeý júrip jatyr. Jumys babymen. Ol endi jumysta bolmaidy. Sol kúni biz ony kelmeitin etip is-áreketter jasadyq. Endi bul oqiǵa balabaqshaǵa kir keltirgennen keiin ata-analardan suraqtar da boldy. Oǵan jaýap berdik. Eshkimnen jabylyp, jasyryp jatqan joqpyz», – dedi Balabaqsha meńgerýshisiniń mindetin atqarýshy Elmira Isabekova.
Balabaqsha qyzmetkerleriniń aitýynsha, oqiǵaǵa deiin barlyq top as ishýge ketken. Sol sátte qol jýýǵa barǵan 6 jasar balany tárbieshiniń kómekshisi ertip ákelýi kerek bolǵan. Alaida búldirshinniń soqqy alýyna erkelikke salynǵany sebep bolypty.
«Jaǵdaidy túsindirgennen keiin anasy «Men jedel járdem, politsiia shaqyram» degende biz qarsylyq keltirgen joqpyz. Politsiia keldi. Jedel járdem kelgen soń tekserý júrgizdi», – dedi Balabaqsha meńgerýshisiniń mindetin atqarýshy Elmira Isabekova.
Al áleýmettik jelidegi jazba avtory ulynyń shoshyp qalǵanyn jáne áli kúnge deiin ózin jaisyz sezinetinin jazǵan. Anasynyń aitýynsha, balabaqsha qyzmetkeriniń bul áreketi ózge ata-ananyń da yzasyn keltirip otyr. Oqiǵa bolǵan balabaqshada 50 shaqty bala tárbielenedi. Qyzmetkerlerdiń aitýynsha, qazir bul bóbekjai óziniń qalypty jaǵdaiynda jumys istep jatyr. Degenmen keleshekte balalaryn ákelmekshi bolǵandardyń arasynda oiynan ainyp jatqandar da bar. Olar áleýmettik jelide túrli pikir qaldyryp, tiisti shara qoldanýdy talap etip jatyr.
Bir sátte abyroiy airandai tógilgen jekemenshik balabaqshada búldirshinderdi 4 topqa bólip tárbieleidi. Tárbieshiniń ózinen tiisti bilimi talap etilgenmen, kómekshige qatysty talap joq. Biraq oqiǵadan keiin balabaqsha meńgerýshisi qyzmetkerlermen jinalys ótkizip turýdy ádetke ainaldyrmaq niette.
