Foto: ©️ Tengrinews.kz / Álihan Sariev
13 adamnyń ólimine sebep bolǵan Almatydaǵy hostel týraly qalalyq ákimdik te, tótenshe jaǵdailar departamenti de bilmegen. Bul týraly Almaty qalalyq óńirlik kommýnikatsiialar qyzmetindegi brifingte Tótenshe jaǵdailar ministri Syrym Sháriphanov aitty, - dep habarlaidy Sputnik Qazaqstan.
Ministr qutqarýshylarǵa tar joldar men ǵimarttyń tyǵyz ornalasýy jáne qoiý tútin kedergi keltirgenin aitady.
"Órt ǵimarattyń jertólesinen shyqqan. Jertólede kóptegen ortopediialyq matratstar bolǵan. Órttiń ýshyǵýyna jáne turǵyndarǵa sol kedergi keltirgen. Matratstar janǵan. Saldarynan qoiý tútin shyqqan", - deidi Syrym Sháriphanov.
Marqumdardyń otbasyna qaraly habar berilgen.
"Jaqyndaryn joǵaltqandarǵa habar berildi. Stýdentter turatyn jeri joǵyn oqý oryndaryna aitpaǵan, tipti, bul hostelde turatyndaryn da aitpaǵan. Bul hostel týraly jergilikti ákimdik te, tótenshe jaǵdailar departamenti de bilmegen. Adamdardyń qandai jaǵdaida turyp jatqany týraly habary bolmaǵan. Jaýapty organdardyń mundai shaǵyn biznes ǵimarattaryna tekserý júrgizýge esh zańdy quqyǵy joq", - dedi Tótenshe jaǵdailar ministri.
Sháriphanov órt samokattan shyqty degen aqparatty naqtylaǵan joq, aitýynsha áli tekseriledi. Ministr dál osy hostelge qatysty aqparat múldem bolmaǵanyn aitty.
"Bizde qansha hostel bar ekeni týraly aqparat bar. Biraq bul hostel týraly aqparat bolmai shyqty. Jataqhanalar úsh tipke bólinedi, 2000 sharshy metrden joǵary, iaǵni joǵary táýekeldi jataqhanalar, 1000 sharshy metr jáne 1000 sharshy metrden tómen hostelder. Birinshiden, órt shyqqan ǵimarat hostel retinde tirkelmegen. "2 GIS"-te de tirkelmegen. Óz basym tekserdim. Aýmaǵy 400 sharshy metr bolǵandyqtan, táýekeli tómen. Bizdiń mamandar táýekeli joǵary hostel-jataqhanalardy ǵana tekseredi. Al myna jaǵdai boiynsha barlyq problemalar tolyq tekseriledi, jaýaptyldardy jazalanady", - dedi ministr.
Sondai-aq ol Bas prokýratýra ruqsat berse ǵana hostelder tekseriletinin aitty.
