Foto: poster
27 aqpanda aqyn Aqberen Elgezektiń balalyq shaǵyna negizdelgen «Bolmaǵan balalyq shaq» filmi úlken ekranǵa jol tartty, dep habarlaidy Ult.kz.
Aqberen Elgezek óziniń balalyq shaǵyn proza janrynda jazyp, kitap qylyp jaryqqa shyǵarǵan. Keiin kitap oqyrmannyń kóńilinen oryn taýyp, 40 myń dana bolyp satylǵan. A. Elgezektiń aitýynsha joǵary suranysqa ie shyǵarmany ekranizatsiialaýǵa birneshe rejisser usynys tastaǵan eken, aqyry kórkem film túsirý rejisser Aidyn Sahamanǵa buiyrypty.
Filmde Berik Aitjanov, Erlan Bilál siiaqty tanymal akterler mańyzdy ról somdaǵan. Al basty keiipker Aqberen – Aqoshtyń rólinde Shákárim Almasbek pen Nurtilek Jarylqasyn.
«20 jyl kútken film»
«Bolmaǵan balalyq shaq» filmin tamashalaǵan depýtat Rinat Zaitov Ult.kz tilshisine filmnen alǵan áserin jetkizdi.
«Bul jeke meniń keminde 20 jyl kútken filmim. Ol qandaida bir jalǵansyz, boiaýsyz aitylyp otyrǵan pikir sebebi bizdiń qazaq kinosynda Qoja men Alty jasar Alpamystan basqa balaǵa jaqyn, syrlasy bola alatyndai, úlgisi bola alatyndai tulǵa joq. Tipti Aqberen Elgezektiń óziniń kitabynda da bar ǵoi, Meirambek Besbaev «Boz torǵaidy» oryndaǵan kezde meniń jaqynym siiaqty kórinetin dep. Dál sondai keshegi filmdegi Aqosh balalardyń dosyna ońai ainalatyn tulǵa. Óte sátti shyqqan film. Jáne de ol filmniń ishinde bizdiń joǵalyp ketken institýttar: ata-anany qadirleý bar, sosyn otbasyndaǵy janjal tek qana bir adamnyń kesirinen bolmaityny, áýlettiń arasyndaǵy alaýyzdyqty bir-aq sátte sheshýge bolatyny jáne filmniń eń úlken ideiasy kishkentai balanyń aýzymen «mahabbat» degen sózben túiindeý bul úlken ideologiialyq jumys. Osy rette bizge mine film óndirýshileri kórsetip berdi, osy baǵytta jumys isteýimiz kerek. Biz balalarymyzdy tárbieleimiz desek, dál sondai mýltiplikatsiiada da, basqasynda da osyndai keiipkerler qalyptastyrýymyz kerek. Jasandy robottar emes, balalardyń ózderi siiaqty, solardyń basyndaǵy jaǵdaidy sipattaityn, solar siiaqty mektepte býllingke ushyraityn, kóshede, kórshilerinen joqshylyqty kórip jatqan bala bar ekenin jáne ol armanyna jete alatyn múmkindik bar ekenin kórsetip, solai tárbieleýimiz kerek. Qarirgi tańda eger bizdiń Oqý-aǵartý ministrligi men Mádeniet ministrligi durys bir sheshimge kelse, aidalaǵa shashyp jatqansha aqshamyzdy osyndai ideologiialyq quraldardy ońai paidalanýǵa bolady jáne sony paidalansa eken dep oilaimyn», -deidi Rinat Zaitov.
Filmniń tuńǵysh kórermenderiniń biri aqyn Baýyrjan Qaraǵyzulynyń pikirinshe film estetikalyq turǵydan jańa deńgeige kóterilgen qazaq kinosynyń shynaiy emotsiiaǵa toly týyndysy.
«Bul – rejissýra men poetikalyq prozanyń, vizýal men ishki dramanyń ǵajaiyp toǵysýy dep túsinemin! Bul film – tek kórýge emes, sezinýge arnalǵan. Júrekti aýyrtady, biraq sonymen birge úmit otyn da mazdatady. Kino kórermenniń jan-dúniesine názik tiip, eń tereń jaralardy túrtip ótedi... Jaryq pen kóleńke, mýzyka men únsizdik, jylylyq pen sýyq tústerdiń kontrasty – filmniń árbir detali tereń oiǵa jeteleidi. Sapaly! Baryńyzdar, kórińizder, ókinbeisizder!» -deidi Baýyrjan Qaraǵyzuly.
Aqyn Erǵali Baqashtyń pikirinshe bala Aqosh pen Taǵan róli ádemi shyqqan.
«Dúnieni ustap turǵan meiirim, súiispenshilik, mahabbat. Eger bular bolmaǵanda adamzat ne istegen bolar edi. Ony tap basyp aitý qiyn…», -degen aqyn balalyq, ańǵaldyq, úlken armanǵa jetý jolyndaǵy qorǵansyz jastyń báribir talaby ońynan boldydep qýandy.
«Sábi arman qiial júzinde qalyp qoimai, óz jemisin berdi. Jetistik degen osy bolsa kerek-ti!
Endeshe “Bolmaǵan balalyq shaq”- ty kórińizder. Kinodaǵy názik shtrihtar adamdy oilandyrady. Jaishylyqta mán bermeitin turmystyq- áleýmettik tustar óte kóp. Bárin talqylap jazyp jatý artyq. Filmdi ár adam óz kózimen kórip, júregimen uǵyný kerek», - deidi E. Baqash.
«Taza qazaqsha kino kórgen qandai tamasha!»
Jýrnalist Kámshat Tasbolat filmdi sapaly, tili taza dep baǵalady.
«Qazir shala tilde túsirilgen jeńil-jelpi filmder kóp qoi. Al taza qazaqsha kino kórgen qandai tamasha! Osyndai sapaly jobalar kóp bolýy kerek! Berik Aitjanovtyń oiyny sumdyq, keiipkerin jek kórip ketesiń, kishkentai Aqoshty oinaǵan bala akterdyń da oiyny bólek, bozbala Aqberen de sheber oinaǵan. Oilandyratyn, kúldiretin, jylatatyn film. Rejisserge respekt!» -deidi jýrnalist óziniń feibýk paraqshasynda.
Baljan Jeńisqyzy
