Qyzylorda oblysy Qarmaqshy aýdanynyń ortalyǵy – Josaly kentinde gaz ballony jarylyp, oqiǵa barysynda tórt adam kóz jumdy.
Bul jóninde Qyzylorda oblysynyń ákimi Gúlshara Ábdiqalyqova Facebook áleýmettik jelisindegi paraqshasynda jazdy.
"Jerlester! Búgin Qarmaqshy aýdany Josaly kenti Rústembekov kóshesi, 29 mekenjaiynda ornalasqan jeke turǵyn úide túski saǵat 13:30 kezinde 27 litrlik gaz ballony jarylyp, 144 sharshy metr jer órtke oranyp, 4 adam kóz jumdy. Qaitys bolǵan azamattardyń týǵan-týystaryna Syr eli jurtshylyǵy atynan qaiǵyra kóńil aitamyn", - dep jazdy oblys ákimi.
Sondai-aq, oblys ákimi qaitys bolǵandardyń aty-jónin jariialady. Olar:
-
2001 jyly týǵan S. Ómirtaeva,
-
1981 jyly týǵan R. Aitmahanova,
-
2000 jyly týǵan N. Aitmahanova,
-
1999 jyly týǵan S. Myrhiev.
Órt sóndirý bólimshesiniń qyzmetkerleri kelgenge deiin 1950 jyly týǵan S. Almahanova hirýrgiia bólimshesine jatqyzylǵan.
Órtti sóndirýge tótenshe jaǵdailar departamentiniń 16 qyzmetkeri men 4 tehnikasy, ÓKM-niń 20 qyzmetkeri jáne 4 tehnikasy, jergilikti atqarýshy organnyń 10 qyzmetkeri men 3 tehnikasy, prokýratýranyń 3 qyzmetker, 1 tehnikasy, bastapqy meditsinalyq-sanitarlyq kómek qyzmetiniń 8 mamany men 3 tehnikasy, Qyzylorda elektr taratý toraptary kompaniiasynyń 3 qyzmetkeri men bir tehnikasy jumyldyryldy.
"Bul bárimizge de jeńil timedi. Qazirgi tańda osyǵan bailanysty másele meniń tikelei baqylaýymda tur. Órtten, sýdan, basqa da apattan aman bolaiyqshy, jerlester!", - dep jazdy Ábdiqalyqova.
