Elordada shyqqan tuńǵysh antropolog, qazaq antropologiiasynyń negizin salýshy Orazaq Smaǵulovtyń jańa kitaby tanystyryldy, dep habarlaidy QazAqparat.
«Qazaq halqy men onyń ata tegine orai antropologiialyq ocherkter» atty jańa kitaptyń tusaýkeser rásimine Memlekettik hatshy Qyrymbek Kósherbaev bastaǵan birqatar ziialy qaýym qatysty.
«Ótken jyly ata tegimizdi antropologiialyq turǵydan zerttep, álemge áigilegen Ulttyq ǵylym akademiiasynyń akademigi, qazaqtyń ańyz aqsalaqaly Orazaq Smaǵulov aǵamyzdyń 90 jyldyq mereitoiyn keń kólemde atap óttik. Mine 90-nyń tórine shyqsa da, shyǵarmashylyqtan alystaǵan emes, qazynaly qariianyń taǵy bir týyndysy jaryqqa shyǵyp otyr. Shejireli tarihymyzdy túgendep, týysqandyq júiemizdi zerdelegen jariia ǵylymi eńbektiń jaryq kórýimen quttyqtaimyn. Qazaqtan shyqqan tuńǵysh antropolog, qazaq antropologiiasynyń negizin salýshy Orazaq aǵamyz - ulttyq genetikany tiianaqty zerttegen bilikti maman. Kezinde keńestik tsenzýradan ótpei kitaby órtelip, qýǵyn-súrginge ushyrasa da, qairaty muqalmaǵan qaharman tulǵa», - dedi saltanatty sharada Qyrymbek Kósherbaev.
Onyń aitýynsha, antropolog ardagerdiń otandyq ǵylymnyń damýyna qosqan eńbegi zor jáne óskeleń urpaqqa úlgi-ónege.
«Ǵalym burynǵy eńbekterinde halqymyzdyń 4 myń jyldyq tarihyn túgendese, búgingi týyndysynda jurtymyzdyń 5 myń jyldyq násildik teginiń ulanǵaiyr atajurtymyzben tyǵyz sabaqtastyǵy baryn ǵylymi túrde dáleldep otyr. Irgeli zertteýge qatysty QR Prezidenti Qasym-Jomart Toqaev óziniń qazaq, orys, túrik tilderinde alǵysóz jazǵan», - deidi ol.
Qazaqtyń ata teginen habar beretin jańa týyndy qazaq, orys jáne aǵylshyn tilinde jaryq kórdi.
«Bul týyndynyń ǵylymi ereksheligi - búgingi qazaqtyń osydan 50 ǵasyr burynǵy qazaq jerin mekendegen ulttarmen bailanysy aitylǵan. Ǵylymi túrde eki jolmen dáleldenip otyr, birinshi - sandardy zertteý arqyly, ekinshi ádis - sol kezde qazaq jerinde ómir súrgen taipalardyń súiegine zertteý júrgizý arqyly. Osyndai ǵylymi dáleldemeden keiin qazaq halqynyń tarihy áriden bastalatynyna eshkimniń kúmáni bolmaidy. Antropologiialyq zertteý birneshe baǵyttan turady. Ol degenimiz ertede ómir súrgen adamnyń bet-álpetin zertteý, súiegin jáne qan quramyn zertteý arqyly. Bundai zertteýler álemde joqtyń qasy. Taǵy bir aityp ótetin jait, elimizdiń barlyq óńirleri qamtyldy. Iaǵni, ár aimaqtyń taipalaryna zertteý júrgizildi», - dedi týyndy avtory, akademik, antropolog Orazaq Smaǵulov.
