Foto: Mádeniet jáne aqparat ministrligi
Muhamedjan Dúzenov (1924–1979) - 18 qazanda qazirgi Qostanai oblysynyń Jangeldin aýdanynda týǵan. 1942 jyly Amangeldi orta mektebin bitirgen. 1947 jyly Qostanai qalasyna baryp, oblystyq gazetke qyzmetke turǵan.
Qalamger 1952 jyly M.Gorkii atyndaǵy Ádebiet institýtyn tamamdaǵan soń Qazaq radiosynda istegen. Abai atyndaǵy akademiialyq opera jáne balet teatrynyń ádebiet bólimin basqarǵan, Qostanai oblystyq gazetiniń menshikti tilshisi, mádeniet bóliminiń meńgerýshisi bolǵan.
Muhamedjan Dúzenovtiń alǵashqy óleńderi men áńgimeleri 1949 jyldan baspa betinde jaryq kóre bastady. Birneshe povest, roman kitaptary, dramalyq shyǵarmalary dúniege keldi. Bir aktili pesalar konkýrsynda «Araldyń altyn balyǵy» atty týyndysy ekinshi báige aldy.
Budan bólek qalamger V.Vasilevskaianyń «Plamia na bolotah» romanyn, S.Marshaktyń «Ýmnye veshi» pesasy, L.Kassildiń «Hod beloi korolevy» týyndysyn qazaqshaǵa aýdarǵan.
