Barsha musylman qaýymy úshin eń qasietti ári ulyq merekeniń biri - Oraza ait meiramy bastaldy.
Búgin Allanyń razylyǵy úshin bir ai boiy aýyz bekitip, bes paryzdyń birin oryndaǵan jandar aýyzdaryn ashady. Alla Taǵalaǵa qasietti Ramazan aiyna amandyqta-saýlyqta jetkizgenine sheksiz alǵys aitady. Al Oraza aittyń negizgi sharttary qandai? Paiǵambarymyz Muhammed (s.ǵ.s.) osy meiramdy qalai ótkizdi? QazAqparat agenttigi jasaǵan Oraza aittyń tarihyna qysqasha sholýdy ózderińizben bóliskendi jón sanadyq, qadirli aǵaiyn!
Tarihi derekterge súiensek, Oraza ait 624 jyldan beri atalyp keledi. Aittyń mán-maǵynasyna kelsek, Ait - qýanysh pen shattyqqa toly kún degen maǵynany nemese mereke», «meiram» degen uǵymdy bildiredi. Alla Taǵala ait saiyn adam balasyna ár túrli jaqsylyqtar beredi. Oraza ait meiramy úsh kún boiy toilanady. Ait meiramy aldymen ait namazyn oqýmen bastalady. Súiikti Paiǵambarymyz Muhammed (s.ǵ.s.) óz ósietinde: «Ait kúni birinshi oryndaitynymyz - namaz oqý», - degen. Bul namaz Islamnyń urany bolǵandyqtan, paiǵambarymyz Muhammed (s.ǵ.s.) ómirinde ony bir ret te qaldyrmai oqyǵan. Aitta musylmandardyń bir-birimen tatýlyqtaryn arttyrýy - merekeniń negizgi sáni. Osy maqsatta Paiǵambarymyz (s.ǵ.s.): «Bir-birińe syilyq berip, tatýlasyńdar... Bir-birińe bergen syilyqtaryń - aralaryńdaǵy óshpendilikti joiady», - dep ósiet etken. Oraza ait merekesi sháýýál aiynyń birinshi kúni bastalyp, úsh kúnge sozylady. Ol kúni erterek turyp, ǵusyl alyp, meshitke - ait namazyna hosh iisti bolyp barý - Paiǵambarymyzdyń (s.ǵ.s.) súisine jasaityn amalynan edi. Sondyqtan da, bul amal mustahab sanalady. Sebebi, bul qasietti juma siiaqty kópshilikpen ashyq-jarqyn aralasatyn kún. Juma kúni qandai amaldar súnnet bolsa, ait kúnine de solai. Osy aitqa bailanysty taǵy bir súnnet amaly jaiynda hadiste: «Paiǵambarymyz (s.ǵ.s.) ait kúni meshitke barǵan jolymen qaitpai, basqa jolmen qaitatyn edi», - delingen. Bul da árbir musylman úshin súnnet.
Oraza ait kúnderi árbir musylmannyń shańyraǵynda shelpek, baýyrsaq pisirilip, ár úide ádettegiden sáni de, saltanaty da erekshe merekelik dastarqan jaiylyp, qonaqtar shaqyrylady. Sonymen qatar, jaǵdaiy tómen adamdarǵa járdem kórsetilip, olar da meiramnan tys qalmaidy. Bul kúnderi týǵan-týystar bir jerge jinalady nemese zirat basyna baryp ómirden ozǵan jaqyndarynyń árýaǵyna baǵyshtap quran oqidy. Qasietti Ramazan aiynan keiin keletin osy ulyq merekeni álemdegi jalpy búkil musylmandar airyqsha qýanyshpen, zor yqylaspen atap ótedi. Óitkeni Ramazan - bereke men birlik, beibitshilik, igilik, keshirim, meiirim jáne qaiyrymdylyqtyń aiy bolsa, úsh kún boiy atalyp ótiletin Oraza ait adamdardyń jan dúniesin, sana-sezimin, kóńilin qýanyshqa bóleitin, kirbińnen tazalaityn ulyq mereke bolyp sanalady. Arada qanshama ǵasyr ótse de, bul ulyq meiramnyń mán-mańyzy kemimei, kerisinshe jyl ótken saiyn artyp keledi. Bul meiramnyń ádettegilerden negizgi erkshelikteri - adamdardy baýyrmaldylyqqa, kishipeiildilikke, keshirimdilikke, súiispenshilikke shaqyrady. Musylmandar qudireti kúshti Alla Taǵalanyń adam balasyna bergen nyǵmetterine táýbe aityp, shúkirshilik jasaýǵa úndeidi.
Qasietti Ramazan aiynan keiin kelgen ulyq mereke - Oraza Ait barshamyz úshin qutty bolsyn! Týǵan Otanymyz - Qazaqstanymyz beibitshilik pen tatýlyqtyń qushaǵynda ósip-órkendep, ana tilimizdiń mártebesi arta bersin, islam dini qanatyn keńge jaia bersin! Qazaqstandaǵy árbir shańyraqtyń qut-berekesi molaia tússin!
