Búgin Qazaqstannyń 12 óńirinde kóktemgi UBT bastaldy, dep habarlaidy "Ult aqparat".
«Testileýdi ótkizý kestesine sáikes búgin elimizdiń 12 aimaǵynda UBT ótip jatyr. Al Nur-Sultan qalasy men Batys Qazaqstan oblysynda testileý 12 naýryzda, Atyraý, Qaraǵandy jáne Pavlodar oblystarynda 15 naýryzda bastalady», dep habarlady Bilim jáne ǵylym ministrligi.
Bul joly joǵary oqý ornynyń aqyly bólimine túsýdi josparlaǵan talapkerler úshin uiymdastyrylatyn Ulttyq biryńǵai testileý kompiýter formatynda ótedi. Eger buǵan deiin kóktem aiyndaǵy testileý tek 10 kúnge sozylsa, biyl qatysýshylarǵa 1 ai ýaqyt berildi. Naýryzdaǵy UBT-ǵa qatysýǵa tirkelý Ulttyq testileý ortalyǵy saitynda júrgizildi. Pánder sany ádettegidei beseý: úsh mindetti jáne eki beiindik pán boiynsha testileý júrgiziledi. Testileýge jalpy 4 saǵat (240 minýt) beriledi. Maksimaldy ball – 140.
Testileý elektrondy formatta «bir testilenýshi – bir kompiýter – bir kamera» qaǵidasy boiynsha ótedi. Sondai-aq proktoring júiesi qoldanylady, beinebaqylaý ornatylady. Tulǵany tsifrlyq sáikestendirý júiesi – Face ID UBT-ǵa qatyspaq bolǵan bóten adamdardy anyqtaýǵa múmkindik beredi. Osynyń barlyǵy akademiialyq adaldyq qaǵidalarynyń saqtalýyn baqylaýdy kúsheitýge jaǵdai jasaidy
UBT ótkizý kezinde sanitarlyq talaptar saqtalatyn bolady.
Esterińizge sala ketsek, 2021 jylǵy 20 qańtar men 3 aqpan aralyǵyndaǵy UBT qalaýy boiynsha JOO-ǵa aqyly negizde oqýǵa qabyldaný úshin orta bilim berý uiymdarynyń bitirýshi 11 (12) synyp oqýshylaryna; JOO-ǵa kúndizgi oqý bólimine aqyly negizde qabyldaý úshin UBT nátijesi boiynsha shekti ball almaǵan, UBT nátijeleri joiylǵan, beiindi pánder kombinatsiiasy sáikes kelmeitin UBT nátijeleri bar tulǵalardy kúntizbelik jyly aqyly negizde odan ári qabyldaý úshin; JOO-ǵa aqyly negizde shyǵarmashylyq daiyndyqty talap etetin bilim berý baǵdarlamalary toby boiynsha bilim alýshy jáne basqa bilim berý baǵdarlamalary tobyna aýysýǵa niet bildirgen tulǵalar úshin qaǵaz formatta ótkizildi.
Naqty testileýge 116 085 adam qatysty. Ol ótinish berýshilerdiń 96,6 paiyzyn qurady. Onyń ishinde shektik deńgeiden ótkender sany – 57 679 (49,7%).
