Búgin, iaǵni mamyrdyń 19-nan 20-na qaraǵan túni Ramazan aiynyń sońǵy on kúniniń birinde atap ótiletin – Qadir túni, dep habarlaidy "Ult aqparat".
Búgin meshitter tańǵy saǵat 07:00 men keshki 20:00 aralyǵynda jumys isteitin bolady. Osy rette Qazaqstan Musylmandary dini basqarmasy Qadir keshin óz úiinde ótkizý qajettigin eldiń qaperine salady, tártipke baǵynýdy suraidy.
Qazaqstan Musylmandary dini basqarmasy Bas sanitarlyq dárigerdiń qaýlysyn negizge alyp jáne qazirgi jaǵdaidy eskere kele, jamaǵatpen oqylatyn bes ýaqyt, juma, taraýyq namazdaryna qatysty qoiǵan ýaqytsha shekteýdi óz kúshinde qaldyrǵan edi. Bul jaily QMDB tóraǵasy, Bas múfti Naýryzbai qajy Taǵanuly habarlaǵan bolatyn.
QMDB-nyń málimetinshe, qasietti túnniń qurmetine orai «Hikmet» stýdiiasy jáne Dini basqarmanyń YouTube kanaly arqyly 00:30-dan 02:40-qa deiin «Myń aidan da qaiyrly Qadir túni» atty onlain baǵdarlama kórsetiledi.
Tikelei efir Bas múftidiń Qadir túnine arnalǵan quttyqtaý sózimen bastalady. Odan ári Myrzatai Joldasbekov, Ǵarifolla Esim, Baqytjan Ertaev jáne taǵy basqa el aǵalary merekelik lebizin bildiredi.
Elordadaǵy «Áziret Sultan» meshitinde 24 sáýirde bastalǵan «Ramazandaǵy Quran hatym» atty onlain hatym oqý («Áziret Sultan» meshitiniń naib imamy) sharasy túiindelip, Quran hatym duǵasy jasalady. «Áziret Sultan» meshitiniń bas imamy Erbolat Júsipov «Qulshylyq jasaýdaǵy yqylas-niettiń orny», QMDB Ýaǵyz-nasihat bóliminiń meńgerýshisi Batyrjan Mansurov «Zikir, salaýat jáne tasbih aitýdyń artyqshylyǵy», QMDB Dini bilim jáne kadr daiarlaý bóliminiń meńgerýshisi Smaiyl Seitbekov «Islam – meiirim dini» taqyryptarynda ýaǵyz-nasihat aitady.
Onlain baǵdarlama barysynda QMDB Shariǵat jáne pátýa bóliminiń mamany Medet Qursaqov kórermender tarapynan qoiylǵan din taqyrybyndaǵy suraqtarǵa jaýap berse, QMDB Ýaǵyz-nasihat bóliminiń mamany Hamzat Ádilbekov tikelei efirde viktorinalyq suraq joldaidy. Sondai-aq «Qadir túnindegi qulshylyq», «Qadir túniniń duǵasy» beinerolikteri kórsetiledi. Baǵdarlamalardyń oidaǵydai ótýin «Hikmet» stýdiiasynyń tilshisi Erkin Shákir qadaǵalaidy.
Aita keteiik, elimizdiń keibir telearnalary men radiolary da Qadir túnine habar arnaidy. «Qazaqstan» Ulttyq telearnasy qasietti túnde 22:00-den bastap tańsárige deiin tikelei habar taratsa, Qazaq radiosy 18:10-nan bastap arnaiy shyǵarylym usynady.
Biyl Ramazan aiy sáýirdiń 23-inen 24-ine qaraǵan túni bastalyp, 23 mamyrda aiaqtalady. Pirit-sadaqa kólemi jan basyna 370 teńgeden belgilendi.
