QR Bilim jáne ǵylym ministrliginiń pedagogterdi jumysqa qabyldaý qaǵidalaryna qatysty jańa buiryǵy QR Ádilet ministrliginde tirkeldi, dep habarlaidy QazAqparat.
Bul jaiynda Bilim jáne ǵylym ministri Ashat Aimaǵambetov Facebook paraqshasynda jazdy.
«Endi pedagogterdi jumysqa qabyldaý jańa formatta konkýrs jáne naqty kriteriiler boiynsha júzege asyrylady. Aita ketken jón, atalǵan ózgerister muǵalimderdi jumysqa ornalastyrý kezinde ashyqtyqty qamtamasyz etýge, sybailas jemqorlyq táýekelderin joiýǵa jáne jumysqa qabyldaý kezinde meritokratiia qaǵidalaryn qamtamasyz etýge baǵyttalǵan. Buǵan deiin naqty ereje bolǵan joq, iaǵni mektep direktory kimdi jáne qandai kórsetkishter boiynsha jumysqa qabyldaý kerektigi týraly ózi sheshetin. Birqatar aimaqta saǵattar sanyn durys bólmei, úsh-tórt muǵalim bir stavkaǵa qabyldanǵan jaǵdailar tirkeldi. Mundai jaǵdailar qandai sebepterge bailanysty oryn alatynyn boljaý qiyn emes», - dep jazady ministr.
Onyń aitýynsha, budan bylai bilim berý uiymdary barlyq bos nemese ýaqytsha bos laýazymdarǵa konkýrs ótkizedi. Bul shaǵyn jinaqty mektepterge qatysty emes.
Baiqaýǵa biliktilik sipattamalaryna sáikes keletin muǵalimder qatysady.
«Endi tolyǵyraq atap óteiin. Jumysqa ornalasý kezinde úmitker konkýrsqa qatysý týraly ótinish beredi. Ótinish berýshi óziniń baǵalaý paraǵyn qosa usynady. Onda barlyq jetistigi, nátijeleri, eńbek ótili, ákimshilik nemese ádistemelik qyzmet tájiribesi, kýrstyq daiyndyq jáne basqa da aqparat kórsetiledi. Árbir baǵyt boiynsha kandidat belgilengen kriteriiler arqyly baǵalaý shkalasyna sáikes óz baldaryn derbes qoiady.
Konkýrstyq komissiia ótinish berýshiniń ózi qoiǵan baldardyń, olardy rastaityn qujattardyń sáikestigin tekserip, qorytyndy upai shyǵarady. Nátijesinde bos orynǵa eń kóp ball jinaǵan úmitker qabyldanady. Sýbektivizm deńgeii barynsha tómendeidi.
Sonymen birge burynǵy jumys ornynan usynys hattar da suratylady. Úmitker oń usynys úshin 3 ball jinasa, al teris usynys úshin 5 ball joǵaltady.
Uiymdar úmitkerdiń qandai da bir buzýshylyqtarǵa, onyń ishinde pedagogikalyq etika boiynsha buzýshylyqtarǵa jol berdi me, joq pa, sol týraly aqparatty eskere alady. Mundai faktiler anyqtalsa, pedagog kez kelgen kezeńde konkýrstan shettetiledi.
Erejede úmitkerdiń biliktilik sanatynyń mindetti túrde bolýy qarastyrylǵan.
Endi joǵary oqý oryndary men kolledj túlekterine jumysqa qabyldaný úshin diplomnyń bolýy jetkiliksiz ekenin atap ótken jón. Olar Ulttyq biliktilik testileýden ótip, odan ári mektepte «pedagog» birinshi sanatyn alýǵa mindetti» dep túsindirdi ministr.
Pedagog qyzmetin negizgi jumysymen qosa atqaratyn muǵalimderdi bir pán boiynsha 8 saǵattan aspaityn júktememen konkýrssyz jumysqa qabyldaýǵa ruqsat etiletinin aita ketken jón.
Sondai-aq osy bilim berý uiymynyń muǵalimderi arasynda júktemesi 8 saǵattan az bos oryndardy úlestirýge bolady. Bul rette bir pán boiynsha bos 9 nemese odan da kóp saǵatty jasandy túrde bólshekteýge jol berilmeidi.
Qabyldanǵan ereje pedagogtermen, sarapshylarmen, mektep direktorlary jáne ádiskerlermen, bilim basqarmalarynyń basshylarymen jáne basqa da bilim berý uiymdarynyń ókilderimen talqylandy.
Atalǵan sharalar sybailas jemqorlyq táýekelderin joiýǵa jáne pedagog laýazymyna úmitkerlerdi sapaly irikteýge baǵyttalǵan.
